ദാരുണമായ സംഭവമാണ് അഹമ്മദാബാദില് നടന്നതെന്ന് മുഖ്യമന്ത്രി പിണറായി വിജയന്. കേന്ദ്ര സര്ക്കാര് ആവശ്യമായ തുടര്നടപടികള് സ്വീകരിക്കണം. പരിശോധനകള് ആരംഭിച്ചത് കൊണ്ട് പ്രാരംഭഘട്ടത്തില് ഒരു അഭിപ്രായം പറയാന് കഴിയില്ലെന്ന് പിണറായി വിജയന് അഭിപ്രായപ്പെട്ടു. ഇറാനില് ഇസ്രയേല് നടത്തിയ ആക്രമണത്തിലും മുഖ്യമന്ത്രി പ്രതികരിച്ചു.
'രാജ്യം കണ്ട ഏറ്റവും വലിയ വിമാനദുരന്തങ്ങളിലൊന്നാണ് നടന്നത്. സംഭവിച്ചതെന്തെന്ന് കണ്ടെത്തി സുരക്ഷ ഒരുക്കുന്നതിന് ആവശ്യമായ നടപടികള് സ്വീകരിക്കണം. കേന്ദ്ര സര്ക്കാര് ആവശ്യമായ തുടര് നടപടികള് സ്വീകരിക്കണം. സംഭവത്തില് മരണപ്പെട്ട എല്ലാവരുടെയും വേര്പ്പാട് അത്യന്തം വേദനാജനകമാണ്. കേരളത്തില് നിന്നുള്ള സഹോദരിയും മരിച്ചു. അഗാധമായ ദുഖമാണ് നാടൊട്ടാകെ രേഖപ്പെടുത്തിയത്', പിണറായി വിജയന് പറഞ്ഞു.
ഇസ്രയേല് പണ്ടേ ലോക തെമ്മാടി രാഷ്ട്രമാണെന്ന് ഇറാനില് നടത്തിയ ആക്രമണത്തെ കുറിച്ചുള്ള ചോദ്യത്തിന് മറുപടിയായി മുഖ്യമന്ത്രി പറഞ്ഞു. സാമാന്യമായ ഒരു മര്യാദയും പാലിക്കേണ്ടതില്ലെന്ന് അംഗീകരിച്ച് പോരുന്ന രാഷ്ട്രമാണ് ഇസ്രയേലെന്നും മുഖ്യമന്ത്രി പറഞ്ഞു. അമേരിക്കയുടെ പിന്തുണയുണ്ടന്ന ധിക്കാര സമീപനമാണ് ഇസ്രയേലിന്റേതെന്നും മുഖ്യമന്ത്രി പറഞ്ഞു.
അത്യന്തം സ്ഫോടനാത്മകമായ വിവരമാണ് വന്നത്. അത്തരമൊരു ആക്രമണത്തെ ന്യായീകരിക്കാന് കഴിയില്ല. അത് ലോക സമാധാനത്തിന് അങ്ങേയറ്റം ഭീഷണിയാണ്. സമാധാന കാംക്ഷികളായ എല്ലാവരും അക്രമത്തെ എതിര്ക്കാനും അപലപിക്കാനും തയ്യാറാകണം', മുഖ്യമന്ത്രി പിണറായി വിജയന് പറഞ്ഞു.
Facebook
Twitter
