കേരളത്തിലെ ട്രെയിന് ഗതാഗത രംഗത്ത് പുതിയ നാഴികക്കല്ലായി എറണാകുളത്ത് നിന്ന് ബംഗളൂരുവിലേക്കുള്ള വന്ദേഭാരത് എക്സ്പ്രസ് സര്വീസ് പ്രധാനമന്ത്രി നരേന്ദ്ര മോദി ഓണ്ലൈനായി ഫ്ലാഗ് ഓഫ് ചെയ്തു. ഇതോടെ സംസ്ഥാനത്ത് സര്വീസ് നടത്തുന്ന വന്ദേഭാരത് ട്രെയിനുകളുടെ എണ്ണം മൂന്നായി. പുതിയ എറണാകുളം-ബംഗളൂരു വന്ദേഭാരത് എക്സ്പ്രസ് ഞായറാഴ്ച മുതല് സര്വീസ് ആരംഭിക്കും.
വാരാണസിയില് നടന്ന ചടങ്ങില് വെച്ചാണ് കേരളത്തിലേത് അടക്കം നാല് വന്ദേഭാരത് സര്വീസുകള് പ്രധാനമന്ത്രി നരേന്ദ്ര മോദി ഓണ്ലൈനായി ഫ്ലാഗ് ഓഫ് ചെയ്തത്. രാവിലെ 8 മണി മുതല് 8.40 വരെയായിരുന്നു ഉദ്ഘാടന ചടങ്ങുകള്. എറണാകുളം സൗത്ത് റെയില്വേ സ്റ്റേഷനില് നടന്ന ചടങ്ങില് കേരള ഗവര്ണര് രാജേന്ദ്ര ആര്ലേക്കര്, കേന്ദ്രമന്ത്രി സുരേഷ് ഗോപി, ബിജെപി സംസ്ഥാന അധ്യക്ഷന് രാജീവ് ചന്ദ്രശേഖരന് എന്നിവര് പങ്കെടുത്തു.
എറണാകുളം - ബംഗളൂരു റൂട്ടിലെ ഏറ്റവും വേഗമേറിയ ട്രെയിനാണിത്. ബുധനാഴ്ചകളില് സര്വീസ് ഉണ്ടായിരിക്കുന്നതല്ല. കെഎസ്ആര് ബംഗളൂരുവില് നിന്ന് രാവിലെ 5.10 ന് പുറപ്പെടുന്ന ട്രെയിന് ഉച്ചയ്ക്ക് 1.50 ന് എറണാകുളത്ത് എത്തിച്ചേരും. തിരികെ ഉച്ചയ്ക്ക് 2.20 ന് എറണാകുളത്തു നിന്ന് പുറപ്പെട്ട് രാത്രി 11 മണിക്ക് ബംഗളൂരുവിലെത്തും. 8 മണിക്കൂര് 40 മിനിറ്റാണ് യാത്രാ സമയം. തൃശൂര്, പാലക്കാട്, കോയമ്പത്തൂര്, തിരുപ്പൂര്, ഈറോഡ്, സേലം, എന്നിവയാണ് എറണാകുളത്തിനും ബംഗളൂരുവിനും ഇടയില് ട്രെയിന് നിര്ത്തുന്ന പ്രധാന സ്റ്റേഷനുകള്.
Facebook
Twitter
