ദില്ലി സ്ഫോടനം; കാര് ഓടിച്ചത് ഉമര് മുഹമ്മദെന്ന് സംശയം ; ഫരീദാബാദ് ഭീകരസംഘത്തില് പൊലീസ് തെരയുന്ന വ്യക്തി
ദില്ലി ചെങ്കോട്ട സ്ഫോടനത്തിന് ഉപയോഗിച്ച കാര് ഓടിച്ചത് ഉമര് മുഹമ്മദെന്ന് സൂചന. ഫരീദാബാദ് ഭീകര സംഘത്തില് പൊലീസ് തെരയുന്ന വ്യക്തിയാണ് ഇയാളെന്നാണ് ദില്ലി പൊലീസ് വൃത്തങ്ങള് നല്കുന്ന വിവരം. ഭീകരവാദിയായ ഉമര് മുഹമ്മദാണ് കാര് ഓടിച്ച് ചെങ്കോട്ടയിലെത്തിയതെന്നാണ് സംശയിക്കുന്നത്. സ്ഫോടനം നടന്ന ഐ20 കാറില് നിന്ന് കണ്ടെത്തിയ മൃതദേഹം ഇയാളുടേതാണോയെന്ന് തിരിച്ചറിയാന് ഡിഎന്എ പരിശോധന നടത്തും.
കറുത്ത മാസ്കിട്ടയാള് റെഡ് ഫോര്ട്ടിലെ പാര്ക്കിംഗ് ഗ്രൗണ്ടില് നിന്ന് കാറുമായി പുറത്തേക്കിറങ്ങുന്ന ദൃശ്യങ്ങള് ദേശീയ മാധ്യമങ്ങള് പുറത്തുവിട്ടിരുന്നു. ഇത് ഉമര് മുഹമ്മദാണെന്നകാര്യമടക്കമാണ് പൊലീസ് പരിശോധിക്കുന്നത്. മാസ്ക് ധരിച്ച ഒരാള് കാര് ഓടിക്കുന്നതും ദൃശ്യങ്ങളിലുണ്ട്. കാര് ചെങ്കോട്ടയ്ക്ക് മുന്നില് മൂന്നു മണിക്കൂര് നിര്ത്തിയിട്ടു. ഉന്നമിട്ടത് തിരക്കേറിയ ചാന്ദ്നി ചൗക്ക് മാര്ക്കറ്റാണെന്നാണ് സൂചന. സ്ഫോടനം നടന്ന സ്ഥലത്തെ സിസിടിവി ദൃശ്യങ്ങള് ശേഖരിച്ച് അന്വേഷണം ഊര്ജിതമാക്കിയിരിക്കുകയാണ് പൊലീസ്.
കാറിന്റെ ഇപ്പോഴത്തെ ഉടമസ്ഥന് പുല്വാമ സ്വദേശി താരിഖ് എന്നാണ് വിവരം. ഇന്നലെ വൈകിട്ട് 6.55 ഓടെയായിരുന്നു ദില്ലി ചെങ്കോട്ടയില് വന് സ്ഫോടനമുണ്ടായത്.
Facebook
Twitter
