ലോകകപ്പ് സെമി ഫൈനലില് ഇംഗ്ലണ്ടിനെ പരാജയപ്പെടുത്തിയതിന് പിന്നാലെ രാഷ്ട്രീയ പ്രകോപനമുണ്ടാക്കുന്ന ഫോക്ലാന്ഡ് ബാനറുമായി വിജയാഘോഷം നടത്തിയ അര്ജന്റീന താരങ്ങള്ക്കെതിരെ ഫിഫ അച്ചടക്ക നടപടി സ്വീകരിച്ചേക്കുമെന്ന് റിപ്പോര്ട്ട്.
അറ്റ്ലാന്റയിലെ മെഴ്സിഡസ് ബെന്സ് സ്റ്റേഡിയത്തില് നടന്ന ആവേശകരമായ സെമി ഫൈനലില് ഇംഗ്ലണ്ടിനെ 2-1 ന് പരാജയപ്പെടുത്തിയതിന് പിന്നാലെയാണ് അര്ജന്റീന താരങ്ങള് വിവാദ ബാനറുമായി രംഗത്തെത്തിയത്. അര്ജന്റീന മിഡ്ഫീല്ഡര് ജിയോവാനി ലോ സെല്സോയും പ്രതിരോധ താരം നിക്കോളാസ് ഒട്ടാമെന്ഡിയും ചേര്ന്ന് 'ലാസ് മാല്വിനാസ് സോണ് അര്ജന്റീനാസ്' (Las Malvinas son Argentinas - മാല്വിനാസ് അഥവാ ഫോക്ലാന്ഡ് ദ്വീപുകള് അര്ജന്റീനയുടേതാണ്) എന്ന് എഴുതിയ വലിയ ബാനറുമായി മൈതാനത്ത് വിജയാഘോഷം നടത്തുകയായിരുന്നു.
ആദ്യം ഗാലറിയിലെ അര്ജന്റീന ആരാധകര് പ്രദര്ശിപ്പിച്ച ഈ ബാനര്, ലോ സെല്സോ വാങ്ങി മൈതാനത്ത് വിരിക്കുകയായിരുന്നു.
സംഭവം ശ്രദ്ധയില്പ്പെട്ടിട്ടുണ്ടെന്നും ഇതിന്മേല് അച്ചടക്ക നടപടി ആവശ്യമാണോ എന്ന് പരിശോധിച്ചുവരികയാണെന്നും ഫിഫ സ്ഥിരീകരിച്ചു.
'സാധാരണ നടപടിക്രമങ്ങളുടെ ഭാഗമായി, ഫിഫയുടെ സ്വതന്ത്ര അച്ചടക്ക സമിതി നിലവില് മാച്ച് റിപ്പോര്ട്ടുകള് വിലയിരുത്തുകയും സാഹചര്യങ്ങള് പരിശോധിക്കുകയും ചെയ്യുകയാണ്. ഫിഫയുടെ അച്ചടക്ക നിയമങ്ങള് അനുസരിച്ച് തുടര്നടപടികള് ഇതിന് ശേഷമായിരിക്കും തീരുമാനിക്കുക,' ഫിഫ വക്താവ് വ്യക്തമാക്കി.
Facebook
Twitter
