കാനഡയിലെ യുഎസ് അംബാസഡര് പീറ്റ് ഹോക്സ്ട്രയെ രാജ്യത്ത് നിന്ന് പുറത്താക്കണമെന്നാവശ്യപ്പെട്ടുള്ള ഓണ്ലൈന് പാര്ലമെന്ററി ഹര്ജിക്ക് വന് പിന്തുണ. കനേഡിയന് പാര്ലമെന്റിന്റെ ഔദ്യോഗിക കണക്കുപ്രകാരം, ഹര്ജിയില് ഇതിനകം 1,02,317 സാധൂകരിച്ച ഒപ്പുകള് ലഭിച്ചിട്ടുണ്ട്.
ഹോക്സ്ട്രയെ 'persona non grata' ആയി പ്രഖ്യാപിച്ച് കാനഡയില് നിന്നുള്ള അദ്ദേഹത്തിന്റെ നീക്കം ആവശ്യപ്പെടണമെന്നാണ് ഹര്ജിയിലെ പ്രധാന ആവശ്യം. കൂടാതെ, കാനഡയുടെ ആഭ്യന്തര കാര്യങ്ങളില് യുഎസ് നയതന്ത്ര ഇടപെടലുകള് സംബന്ധിച്ച് പാര്ലമെന്ററി കമ്മിറ്റി അന്വേഷണം നടത്തണമെന്നും ഹര്ജിയില് ആവശ്യപ്പെടുന്നു.
ഹോക്സ്ട്ര കാനഡ-യുഎസ് നയതന്ത്രബന്ധത്തെ ദുര്ബലപ്പെടുത്തുന്ന പ്രസ്താവനകള് നടത്തിയെന്നും കനേഡിയന് രാഷ്ട്രീയത്തില് നയതന്ത്ര ചട്ടങ്ങള്ക്ക് വിരുദ്ധമായി ഇടപെട്ടെന്നും ഹര്ജിയില് ആരോപിക്കുന്നു.
കാനഡയെ യുഎസിന്റെ 51-ാമത്തെ സംസ്ഥാനമാക്കണമെന്ന ട്രംപ് ഭരണകൂടത്തിന്റെ പരാമര്ശങ്ങളെ ഹോക്സ്ട്ര സാധാരണവത്കരിച്ചതായും 2025ലെ കനേഡിയന് തിരഞ്ഞെടുപ്പിനെ 'anti-American' എന്ന് വിശേഷിപ്പിച്ചതായും ഹര്ജിയില് ചൂണ്ടിക്കാട്ടുന്നു.
കാല്ഗറിയിലെ ലീന് വാക്കര് ആരംഭിച്ച ഹര്ജി ഗ്രീന് പാര്ട്ടി നേതാവ് എലിസബത്ത് മേയാണ് ഹൗസ് ഓഫ് കോമണ്സില് അവതരിപ്പിക്കുക. ഹര്ജിയില് ഒപ്പിടാനുള്ള കാലാവധി നവംബര് 18 വരെ തുടരും
Facebook
Twitter
