കാലിഫോര്‍ണിയയിലെ സനോസയില്‍ മലയാളി യുവതികള്‍ ദാരുണയായി കൊല്ലപ്പെട്ടത്തില്‍ ദുരൂഹതയേറുന്നു. വെള്ളിയാഴ്ച നടന്ന ഓണാഘോഷത്തില്‍ സന്തോഷത്തോടെ ആന്‍മേരിക്കും അഞ്ജനയ്ക്കുമൊപ്പം പ്രതിയായ അനില പങ്കെടുത്തിരുന്നു. ആഘോഷത്തിന്റെ ചിത്രങ്ങള്‍ ഇവര്‍ സമൂഹ മാധ്യമങ്ങളിലും പങ്കുവച്ചു. ഉറ്റ സുഹൃത്തുക്കളായ ഇരുവരേയും വകവരുത്താന്‍ പ്രകോപനമെന്തെന്ന് മനസിലാകാതെ നടുങ്ങിയിരിക്കുകയാണ് സനോസയിലെ മലയാളി സമൂഹം.
അതേസമയം ആന്‍മേരിയുമായി അനിലയ്ക്ക് തൊഴില്‍ സംബന്ധമായ ചില തര്‍ക്കങ്ങള്‍ നിലനിന്നിരുന്നതായി ബന്ധം ജെറി സാം ജോസഫ് വെളിപ്പെടുത്തിയതായി റിപ്പോര്‍ട്ടില്‍ പറയുന്നു. അതേസമയം അഞ്ജനയുമായി ഏതെങ്കിലും തരത്തിലുള്ള വാക്കുതര്‍ക്കമോ പിണക്കമോ ഉണ്ടായിരുന്നതായി കുടുംബത്തിന് വിവരമില്ല. ആന്‍മേരിയെ ഫ്‌ളാറ്റിലെ മുറിക്കുള്ളില്‍ വച്ച് അനില കുത്തികൊല്ലുകയായിരുന്നുവെന്നാണ് പ്രാഥമിക നിഗമനം.
പൊലീസെത്തുമ്പോള്‍ രക്തം വാര്‍ന്ന് മരിച്ച നിലയിലാണ് ആന്‍ മേരിയെ കണ്ടെത്തിയത്. ഒരു കാര്യം പറയാനുണ്ടെന്നും താഴേക്ക് ഇറങ്ങിവരാമോ എന്നും അഞ്ജനയോട് ചോദിച്ച് ഫ്‌ളാറ്റില്‍ നിന്ന് താഴേക്ക് ഇറക്കിയ ശേഷം നീല നിറത്തിലെ കാര്‍ ഉപയോഗിച്ച് അപായപ്പെടുത്തുകയായിരുന്നുവെന്നും റിപ്പോര്‍ട്ടുകളുണ്ട്. ഫോറന്‍സിക് പരിശോധന പൂര്‍ത്തിയായ ശേഷം മാത്രമേ മൃതദേഹം ബന്ധുക്കള്‍ക്ക് കൈമാറുകയുള്ളൂവെന്നാണ് റിപ്പോര്‍ട്ട്.
തിരുവനന്തപുരം കേശവദാസപുരം സ്വദേശിയായ ആന്‍ മേരി പത്തുവര്‍ഷത്തോളമായി എഞ്ചിനീയറായി യുഎസില്‍ ജോലി ചെയ്തുവരികയാണ്. കോട്ടയം ചിങ്ങവനം സ്വദേശിയായ പള്ളത്ര ജേക്കബാണ് ഭര്‍ത്താവ്. കാലിഫോര്‍ണിയയിലെ സ്‌കൂളില്‍ ആറുവര്‍ഷമായി അധ്യാപികയായി ജോലി ചെയ്തുവരികയാണ് തൃശൂര്‍ സ്വദേശിയായ അഞ്ജന. ഭര്‍ത്താവ് വിജേഷും യുഎസില്‍ ഇവര്‍ക്കൊപ്പമാണുള്ളത്. അനില ഇവര്‍ക്കൊപ്പം ഒരേ ഫ്‌ളാറ്റിലാണ് താമസിച്ചിരുന്നതെന്നാണ് ബന്ധുക്കള്‍ പറയുന്നത്.
Facebook
Twitter
