മാന്യമായ ഒരു മരണം. അത് ഏതൊരു പൗരന്റെയും അവകാശമാണ്. യുദ്ധമില്ലാത്ത, സമാധാനപരമായ അന്തരീക്ഷത്തില്‍ താമസിച്ചിട്ടും ബ്രിട്ടന് തങ്ങളുടെ പൗരന്‍മാര്‍ക്ക് അത്തരമൊരു ആഡംബരം നല്‍കാന്‍ സാധിക്കുന്നില്ല. എന്‍എച്ച്എസിലെ തിരക്കേറിയ അവസ്ഥയെ കുറിച്ച് ഗവണ്‍മെന്റിന് ആരും ക്ലാസെടുക്കേണ്ടതില്ല. പക്ഷെ ആ അവസ്ഥ മെച്ചപ്പെടുത്താനുള്ള ശ്രമങ്ങള്‍ പരാജയമായി മാറുന്നതോടെ സാധാരണ പൗരന്‍ തീര്‍ത്തും മനുഷ്യത്വരഹിതമായ സാഹചര്യങ്ങളില്‍ കിടന്ന് മരണത്തെ പുല്‍കുകയാണ്.
ഇടനാഴികളിലും, താല്‍ക്കാലിക ഇടങ്ങളിലുമായി രോഗികള്‍ മരണത്തെ പുല്‍കുന്നത് പുതിയ വാര്‍ത്തയല്ല. എന്നാല്‍ തങ്ങള്‍ക്ക് ഇത്തരം ഇടങ്ങളില്‍ ചികിത്സ നല്‍കേണ്ട ഗതികേട് നേരിടുന്നതായാണ് ഒരു സര്‍വ്വെയില്‍ പങ്കെടുത്ത പകുതിയിലേറെ നഴ്‌സുമാരും അറിയിച്ചത്.
ജീവനക്കാരുടെ ക്ഷാമം മൂലമാണ് യഥാര്‍ത്ഥത്തില്‍ ഈ ഹീനമായ മരണവും, മോശം പരിചരണവും എന്‍എച്ച്എസ് ആശുപത്രികളില്‍ നല്‍കേണ്ടി വരുന്നതിന് കാരണമെന്ന് ആരോഗ്യ പ്രവര്‍ത്തകര്‍ മുന്നറിയിപ്പ് നല്‍കുന്നു. പരിചരണത്തില്‍ കൃത്യമായ തയ്യാറെടുപ്പുകളുടെ അഭാവം നേരിടുന്നതായി നഴ്‌സുമാര്‍ ഗവേഷകരോട് പറഞ്ഞു. ഇത് അനിശ്ചിതാവസ്ഥയും, രോഗികളെ മരിക്കാന്‍ അനുവദിക്കുന്നതിന് പകരം പുനരുജ്ജീവന ചികിത്സകള്‍ നല്‍കുന്നതിലേക്കും നയിക്കുന്നുണ്ടെന്ന് ഇവര്‍ വ്യക്തമാക്കി.
1153 യുകെ നഴ്‌സുമാരെയും, ഹെല്‍ത്ത്‌കെയര്‍ പ്രൊഫഷണലുകളെയും ഉള്‍പ്പെടുത്തിയാണ് മേരി ക്യൂറി ചാരിറ്റിയും, നഴ്‌സിംഗ് വെബ്‌സറ്റ് നഴ്‌സിംഗ് സ്റ്റാന്‍ഡേര്‍ഡും സര്‍വ്വെ സംഘടിപ്പിച്ചത്. പത്തിലൊന്ന് നഴ്‌സുമാരാണ് രോഗികള്‍ക്ക് ചികിത്സ നല്‍കാന്‍ പാടില്ലാത്ത ഇടങ്ങളില്‍ അവസാന സമയത്തെ പരിചരണം നല്‍കേണ്ടി വന്നതായി വെളിപ്പെടുത്തിയത്.
ജീവനക്കാരുടെ ലെവലാണ് പ്രധാന പ്രശ്‌നമെന്ന് 72 ശതമാനവും, ആവശ്യത്തിന് സമയം കിട്ടാത്തത് പ്രശ്‌നമാണെന്ന് 56 ശതമാനം പേരും വ്യക്തമാക്കി. എല്ലാം ശരിയാക്കുമെന്ന പതിവ് പല്ലവിയാണ് റിപ്പോര്‍ട്ടില്‍ ഹെല്‍ത്ത് & സോഷ്യല്‍ കെയര്‍ ഡിപ്പാര്‍ട്ട്‌മെന്റ് നല്‍കുന്ന പ്രതികരണം.
Facebook
Twitter
