ലണ്ടന് പുറത്ത് വാടക നിരക്കുകള്‍ ചരിത്രത്തില്‍ ആദ്യമായി 1400 പൗണ്ട് കടന്നു; തലസ്ഥാനത്ത് വാടക കൊടുത്ത് ജീവിക്കുന്ന അസാധ്യമായി മാറുന്നു; വാര്‍ഷിക റെന്റ് വളര്‍ച്ച മെല്ലെപ്പോക്കില്‍ ആകുന്നത് ആശ്വാസം

ലണ്ടന് പുറത്ത് വാടക നിരക്കുകള്‍ ചരിത്രത്തില്‍ ആദ്യമായി 1400 പൗണ്ട് കടന്നു; തലസ്ഥാനത്ത് വാടക കൊടുത്ത് ജീവിക്കുന്ന അസാധ്യമായി മാറുന്നു; വാര്‍ഷിക റെന്റ് വളര്‍ച്ച മെല്ലെപ്പോക്കില്‍ ആകുന്നത് ആശ്വാസം
ആദ്യമായി ലണ്ടന് പുറത്തുള്ള വാടക നിരക്കുകള്‍ 1400 പൗണ്ട് മറികടന്നു. വാര്‍ഷിക റെന്റ് വളര്‍ച്ച മെല്ലെപ്പോക്ക് നേരിടുന്ന ഘട്ടത്തിലാണ് ഇത്. കഴിഞ്ഞ വര്‍ഷങ്ങളില്‍ റെക്കോര്‍ഡ് നിരക്ക് വര്‍ദ്ധനയ്ക്ക് ശേഷമാണ് വാര്‍ഷിക നിരക്കുകള്‍ കൂടുന്നതിന്റെ വേഗത കുറഞ്ഞതെന്ന് റൈറ്റ്മൂവ് റിപ്പോര്‍ട്ട് പറയുന്നു.

പ്രോപ്പര്‍ട്ടി പോര്‍ട്ടലിന്റെ ഏറ്റവും പുതിയ കണക്ക് പ്രകാരം ശരാശരി പ്രതിമാസ റെന്റ് തലസ്ഥാനത്തിന് പുറത്ത് 1418 പൗണ്ടിലേക്ക് എത്തി. ക്വാര്‍ട്ടേര്‍ലി വര്‍ദ്ധന 1.5 ശതമാനമാണ്. വാര്‍ഷിക വളര്‍ച്ച 2.4 ശതമാനവുമാണ്. 2021 മുതല്‍ 2023 വരെ ഏകദേശം 10% വര്‍ദ്ധനവാണ് നിരക്കുകളില്‍ രേഖപ്പെടുത്തിയത്.

അതേസമയം ലണ്ടനില്‍ റെന്റല്‍ നിരക്ക് വര്‍ദ്ധന ശക്തമായ നിലയിലാണ്. ഇപ്പോള്‍ പരസ്യപ്പെടുത്തുന്ന ശരാശരി പ്രതിമാസ വാടക 2825 പൗണ്ടാണ്. വാര്‍ഷിക നിരക്ക് വര്‍ദ്ധന 3.2 ശതമാനത്തിലേക്കും ഉയര്‍ന്നു. സപ്ലൈ-ഡിമാന്‍ഡിലെ വ്യത്യാസമാണ് നിരക്കുകളിലും പ്രതിഫലിക്കുന്നത്.

ദേശീയ തലത്തില്‍ തന്നെ വാടക വിപണിയില്‍ ലഭ്യമായ പ്രോപ്പര്‍ട്ടികളുടെ എണ്ണം ഒരു വര്‍ഷം മുന്‍പത്തേക്കാള്‍ 2% കുറഞ്ഞിട്ടുണ്ട്. ഇതേ തോതില്‍ വാടക്കാരുടെ ആവശ്യവും കുറഞ്ഞിട്ടുണ്ട്. ലണ്ടനില്‍ 9% കുറവാണ് റെന്റല്‍ പ്രോപ്പര്‍ട്ടികളില്‍ നേരിടുന്നത്. വാടകക്കാരുടെ ഡിമാന്‍ഡ് 6% താഴ്ന്നു.

ഇതോടെ ലഭ്യമായ വീടുകള്‍ നേടാനായി വാടകക്കാര്‍ മത്സരിക്കേണ്ടി വരുന്നുണ്ട്. വാടക്കാരുടെ അവകാശങ്ങള്‍ വര്‍ദ്ധിപ്പിച്ചതോടെ ലാന്‍ഡ്‌ലോര്‍ഡ് വീടുകള്‍ വിറ്റൊഴിഞ്ഞ് പോകുമെന്ന് ആശങ്കയുണ്ടായെങ്കിലും അക്കാര്യത്തില്‍ ഇപ്പോള്‍ വലിയ തെളിവുകളൊന്നും ലഭ്യമല്ല.

Other News in this category



4malayalees Recommends