ഒമാന് ഒഴികെയുള്ള ഗള്ഫ് രാജ്യങ്ങളില് ചെറിയ പെരുന്നാള് ഇന്ന് ആഘോഷിക്കും
തിങ്കളാഴ്ച ശവ്വാല് മാസപ്പിറവി കണ്ടതായി സൗദി സുപ്രീംകോടതി പ്രഖ്യാപിച്ചതിനാല് ഒമാന് ഒഴികെയുള്ള ഗള്ഫ് രാജ്യങ്ങളില് ചെറിയ പെരുന്നാള് ഇന്ന് ആഘോഷിക്കും. കേരളത്തില് മാസപ്പിറവി ദൃശ്യമാകാത്തതിനാല് ചെറിയ പെരുനാള് ബുധനാഴ്ചയായിരിക്കുമെന്ന് കോഴിക്കോട് വലിയ ഖാസി ഖാദി സയ്യിദ് മുഹമ്മദ് കോയ തങ്ങളും പാളയം ഇമാം വി.പി. സുഹൈബ് മൗലവിയും പാണക്കാട് ഹൈദരലി ശിഹാബ് തങ്ങളും അറിയിച്ചിട്ടുണ്ട്. അതിനാല് റംസാന് നാളുകള് മുപ്പതും പൂര്ത്തിയാക്കിയ ശേഷമാകും കേരളത്തില് ചെറിയ പെരുന്നാള് ആഘോഷിക്കുകയെന്ന പ്രത്യേകതയുമുണ്ട്.
29നാളുകള് നീണ്ടുനിന്ന റംസാന് വ്രതാനുഷ്ഠാനങ്ങള്ക്ക് ശേഷമാണ് വിശ്വാസികള് യു.എ.ഇ.യിലടക്കം ചെറിയ പെരുന്നാള് ആഘോഷിക്കുന്നത്. ചൊവ്വാഴ്ച രാവിലെ ഇവിടെ വിവിധയിടങ്ങളിലെ പള്ളികളിലും ഈദ്ഗാഹുകളിലും പെരുന്നാള് നമസ്ക്കാരം നടക്കും.
സൗദിയുടെ ഔദ്യോഗിക കലണ്ടറായ ഉമ്മുല് ഖുറാ ഹിജ്രി പ്രകാരം ചൊവ്വാഴ്ചയാണ് ശവ്വാല് ഒന്നായി കണക്കാക്കുന്നത്. മാസപ്പിറവി കണ്ടെന്നും ഇല്ലെന്നും തരത്തില് ഓണ്ലൈന് മാധ്യമങ്ങളിലൂടെ അഭ്യൂഹങ്ങള് പരന്നതോടെ ചൊവ്വാഴ്ച ശവ്വാല് ഒന്നായി സുപ്രീം കോടതി സ്ഥിരീകരിക്കുകയായിരുന്നു. മെയ് ആറിനായിരുന്നു ഇവിടെ റംസാന് വ്രതം ആരംഭിച്ചിരുന്നത്.