ഇന്ന് രാവിലെ മുതല് രാത്രികാല കര്ഫ്യൂ പ്രഖ്യാപിച്ച് സൗദി അറേബ്യ; വൈകുന്നേരം ഏഴ് മുതല് പുലര്ച്ചെ ആറ് വരെ ജനങ്ങള് പുറത്തിറങ്ങുന്നതിന് കര്ശന നിയന്ത്രണം; കര്ഫ്യു 21 ദിവസം തുടരും
കൊവിഡ് ഭീഷണി നേരിടാന് കര്ക്കശ നടപടികളുമായി ഗള്ഫ് രാജ്യങ്ങള്. സൗദി അറേബ്യയില് തിങ്കളാഴ്ച മുതല് രാത്രികാല കര്ഫ്യൂ പ്രഖ്യാപിച്ചുകൊണ്ട് സല്മാന് രാജാവ് ഉത്തരവിച്ചു. വൈകുന്നേരം ഏഴ് മുതല് പുലര്ച്ചെ ആറ് വരെ ജനങ്ങള് പുറത്തിറങ്ങുന്നതിന് കര്ശന നിയന്ത്രണമുണ്ടാകും. 21 ദിവസം കര്ഫ്യൂ തുടരും.കര്ഫ്യൂ നടപ്പാക്കുന്നതിന് സിവില്, സൈനിക വിഭാഗങ്ങള് ആഭ്യന്തര മന്ത്രാലയവുമായി സഹകരിക്കണമെന്ന് ഉത്തരവില് പറയുന്നു. സുരക്ഷ, സൈനികം, മാധ്യമം, ആരോഗ്യം എന്നിങ്ങനെയുള്ള തന്ത്രപ്രധാന മേഖലകളെ കര്ഫ്യൂവില് നിന്ന് ഒഴിവാക്കിയിട്ടുണ്ട്. അത്യാവശ്യങ്ങള്ക്കല്ലാതെ ജനങ്ങള് പുറത്തിറങ്ങരുതെന്നാണ് അറിയിപ്പ്. പൊതുജനാരോഗ്യം സംരക്ഷിക്കേണ്ടത് സ്വദേശികളുടെയും പ്രവാസികളുടേയും ബാധ്യതയാണെന്നും മഹാമാരിയുടെ വ്യാപനത്തിന് ആരും കാരണക്കാരാവരുതെന്നും സല്മാന് രജാവിന്റെ ഉത്തരവില് പറയുന്നു.
യുഎഇ ഇന്നുമുതല് എല്ലാ യാത്രാ വിമാനങ്ങള്ക്കും വിലക്ക് ഏര്പ്പെടുത്തി. ചരക്ക് വിമാനങ്ങളും ആളുകളെ അടിയന്തിരമായി ഒഴിപ്പിക്കുന്ന വിമാനങ്ങളും മാത്രമേ അനുവദിക്കൂ. യുഎഇയിലെ വിമാനത്താവളങ്ങളില് ഇറങ്ങിയുള്ള ട്രാന്സിറ്റ് യാത്രയും അനുവദിക്കില്ല. സൗദിയില് ഇതുവരെ 511 പേര്ക്ക് കൊവിഡ് 19 സ്ഥിരീകരിച്ചിട്ടുണ്ട്. ഇന്നലെ മാത്രം 119 പേര്ക്ക് ഇന്ന് രോഗം സ്ഥിരീകരിച്ചത്. ഇന്നലെ രോഗം സ്ഥിരീകരിച്ചവരില് 72 പേര് മക്കയിലാണ്. റിയാദില് 34 പേര്ക്കും ഖത്തീഫില് 4 പേര്ക്കും രോഗം സ്ഥിരീകരിച്ചു. അല് ഹസയിലും അല് ഖോബാറിലും 3 വീതവും ദമ്മാമിലും ദഹ്റാനിലും ഖസീമിലും ഓരോത്തര്ക്കുമാണ് ഇന്നലെ കൊവിഡ് സ്ഥിരീകരിച്ചത്. ഇതോടെ രാജ്യത്തെ കൊവിഡ് ബാധിതരുടെ എണ്ണം 511 ആയതായി ആരോഗ്യ മന്ത്രാലയം അറിയിച്ചു. ഇതില് 17 കുട്ടികളും ഉള്പ്പെടും.