കോവിഡ് രോഗബാധ അതിരൂക്ഷമായ സാഹചര്യത്തില് ഇന്ത്യയില് നിന്നുള്ള വിമാനങ്ങള്ക്ക് യു.എ.ഇയില് പ്രവേശന വിലക്ക് ഏര്പ്പെടുത്തി. യുഎഇയിലെ എല്ലാ വിമാനത്താവളങ്ങളിലും ഇന്ത്യയില് നിന്നുള്ള വിമാനങ്ങള്ക്ക് വിലക്ക് ഏര്പ്പെടുത്തിയിട്ടുണ്ട്. ഈ മാസം 24 മുതല് വിലക്ക് പ്രാബല്യത്തിലാകും. ശനിയാഴ്ച മുതല് 10 ദിവസത്തേക്കാണ് നിരോധനം ഏര്പ്പെടുത്തുന്നത്.
കോവിഡ് സ്ഥിതിഗതികള് വിലയിരുത്തി തീരുമാനം പുനപ്പരിശോധിക്കും. കഴിഞ്ഞ 14 ദിവസം ഇന്ത്യയില് തങ്ങുകയോ ഇതുവഴി ട്രാന്സിറ്റ് ചെയ്യുകയോ ചെയ്ത യാത്രക്കാരെയും യുഎഇയിലേക്ക് വരാന് അനുവദിക്കില്ല.
എമിറേറ്റ്സ്, ഫ്ളൈ ദുബായ് വിമാന കമ്പനികള് ട്രാവല് ഏജന്സികള്ക്ക് ഇത് സംബന്ധിച്ച് അറിയിപ്പ് നല്കി. ഇന്ത്യയില് കൊവിഡ് കേസുകള് ഉയരുന്ന പശ്ചാത്തലത്തിലാണ് തീരുമാനം.