സാമ്പത്തിക സഹകരണ കരാര്; യുഎഇയില് നിന്നുള്ള ഉന്നതതല സംഘം ഇന്ന് ഇന്ത്യയില്
യുഎഇ സാമ്പത്തികകാര്യ മന്ത്രി അബ്!ദുല്ല ബിന് തൗഖ് അല് മറിയുടെ നേതൃത്വത്തില് 80 അംഗ ഉന്നതതല സംഘം ബുധനാഴ്ച ഇന്ത്യയിലെത്തും. ഇന്ത്യയും യുഎഇയും തമ്മില് ഫെബ്രുവരിയില് ഒപ്പുവെച്ച് മേയ് ഒന്ന് മുതല് നിലവില് വന്ന സമഗ്ര സാമ്പത്തിക സഹകരണ കരാറിന്റെ (സി.ഇ.പി.എ) ഭാഗമായാണ് സന്ദര്ശനം. യുഎഇ സാമ്പത്തികകാര്യ മന്ത്രിക്ക് പുറമെ ഇന്ത്യയിലെ യുഎഇ അംബാസഡര് ഡോ. അഹ്മദ് അല് ബന്നയും സര്ക്കാര്, സ്വകാര്യ വ്യാപാര മേഖലകളിലെ പ്രതിനിധികളും സംഘത്തിലുണ്ട്.
രണ്ട് രാജ്യങ്ങളിലുമുള്ള വ്യപാര സമൂഹത്തെ കൂടുതല് ശാക്തീകരിക്കാനുള്ള സുസ്ഥിര സംവിധാനങ്ങള്ക്ക് രൂപം നല്കുകയും കരാറിലൂടെ പരമാവധി പ്രയോജനം ലഭ്യമാക്കുകയുമാണ് സന്ദര്ശനത്തിലൂടെ ലക്ഷ്യമിടുന്നത്. കരാറിന്റെ ഭാഗമായി രണ്ട് രാജ്യങ്ങളിലെയും കമ്പനികള്ക്കും വ്യാപാര സ്ഥാപനങ്ങള്ക്കും ലഭ്യമാവുന്ന അവസരങ്ങളും സഹകരണത്തിനുള്ള സാധ്യതകളും സന്ദര്ശനത്തില് പരിചയപ്പെടുത്തും. ഡല്ഹിയിലും മുംബൈയിലുമായി യോഗങ്ങളും കൂടിക്കാഴ്ചകളും നടക്കും.