ഡ്യൂട്ടിക്കിടെ കുരങ്ങനുമായി കളിക്കുന്ന വീഡിയോ സമൂഹമാധ്യമങ്ങളില് വൈറലായതിനെ തുടര്ന്ന് ആറ് നഴ്സുമാരെ സസ്പെന്ഡ് ചെയ്തു. ഉത്തര്പ്രദേശിലെ ബഹ്റൈച്ചിലെ ഒരു സര്ക്കാര് വനിതാ ആശുപത്രിയിലെ നഴ്സുമാര്ക്കാണ് സസ്പെന്ഷന്. ചില നഴ്സുമാര് ഏപ്രണ് ധരിച്ച് ആശുപത്രി കസേരകളില് ഇരുന്നു കുട്ടികുരങ്ങുമായി കളിക്കുന്നത് വീഡിയോയില് കാണാം. ആശുപത്രിയിലെ ഗൈനക്കോളജി, ഒബ്സ്റ്റട്രിക്സ് വിഭാഗത്തിലാണ് സ്റ്റാഫ് നഴ്സുമാരെ നിയമിച്ചതെന്ന് മഹര്ഷി ബാലര്ക്ക് ഹോസ്പിറ്റലിലെ ചീഫ് മെഡിക്കല് സൂപ്രണ്ട് ഡോ എം.എം ത്രിപാഠി പറഞ്ഞു.
അഞ്ചംഗ ഡോക്ടര്മാരുടെ സമിതി വിഷയം അന്വേഷിക്കുകയാണെന്നും ഡോക്ടര് കൂട്ടിച്ചേര്ത്തു. വൈറലായ വീഡിയോ ശ്രദ്ധയില്പ്പെട്ട മെഡിക്കല് കോളേജ് പ്രിന്സിപ്പല് സഞ്ജയ് ഖത്രി മുഴുവന് പേരെയും സസ്പെന്ഡ് ചെയ്തു. അഞ്ജലി, കിരണ് സിങ്, ആഞ്ചല് ശുക്ല, പ്രിയ റിച്ചാര്ഡ്, പൂനം പാണ്ഡെ, സന്ധ്യാ സിങ് എന്നിവരെയാണ് സസ്പെന്ഡ് ചെയ്തത്.
ഡ്യൂട്ടി സമയത്ത് നഴ്സുമാര് കുരങ്ങിനെ ഉപയോഗിച്ച് റീലുണ്ടാക്കുകയും ജോലിയില് അശ്രദ്ധ കാണിക്കുകയും ചെയ്യുന്ന വീഡിയോ സമൂഹമാധ്യമങ്ങളില് വൈറലായത് മെഡിക്കല് കോളേജിന്റെ പ്രതിച്ഛായയ്ക്ക് മങ്ങലേല്പ്പിച്ചെന്ന് പ്രിന്സിപ്പല് ഉത്തരവില് പറഞ്ഞു. സംഭവത്തില് അന്വേഷണ സമിതി രൂപീകരിച്ചിട്ടുണ്ടെന്നും അദ്ദേഹം കൂട്ടിച്ചേര്ത്തു. അന്വേഷണ സമിതിയുടെ റിപ്പോര്ട്ട് ലഭിക്കുന്നത് വരെ, ആറ് നഴ്സുമാരെ വകുപ്പില് ജോലി ചെയ്യുന്നതില് നിന്ന് സസ്പെന്ഡ് ചെയ്തതായി ഉത്തരവില് പറയുന്നു.
Facebook
Twitter
