ആലപ്പുഴയിലെ കളര്കോട് അപകട മരണത്തിന് കാരണം കനത്ത മഴയില് ഡ്രൈവറുടെ കാഴ്ച മങ്ങിയതെന്ന് നിഗമനം. കനത്ത മഴയില് ഡ്രൈവറുടെ കാഴ്ച മങ്ങിയതാണ് അപകട കാരണമെന്ന് എംവിഡി ഉദ്യോഗസ്ഥരുടെയും പൊലീസിന്റെയും നിഗമനം. കെഎസ്ആര്ടിസി ബസും കാറും കൂട്ടിയിടിച്ച് അഞ്ച് എംബിബിഎസ് വിദ്യാര്ഥികളാണ് മരിച്ചത്. ഓവര്ടേക്ക് ചെയ്യുന്ന സമയത്താണ് അപകടമുണ്ടായത്.
കെഎസ്ആര്ടിസി സൂപ്പര് ഫാസ്റ്റിലേക്ക് കാര് വന്ന് ഇടിച്ചാണ് അപകടമുണ്ടായത്. ഇന്നലെ രാത്രിയായിരുന്നു അപകടം. ആലപ്പുഴയിലേക്ക് സിനിമയ്ക്ക് പോകുകയായിരുന്ന വണ്ടാനം മെഡിക്കല് കോളേജിലെ ഒന്നാം വര്ഷ എംബിബിഎസ് വിദ്യാര്ത്ഥികള് സഞ്ചരിച്ചിരുന്ന കാര് നിയന്ത്രണം തെറ്റി എതിരെ വന്ന കെഎസ് ആര്ടിസി സൂപ്പര് ഫാസ്റ്റ് ബസിലേക്ക് ഇടിച്ചു കയറുകയായിരുന്നു.
പാലക്കാട് സ്വദേശി ശ്രീദേവ് വത്സന്, മലപ്പുറം കോട്ടക്കല് സ്വദേശി ദേവനന്ദന്, കണ്ണൂര് സ്വദേശി മുഹമ്മദ് അബ്ദുല് ജബ്ബാര്, ലക്ഷദ്വീപ് സ്വദേശി മുഹമ്മദ് ഇബ്രാഹിം, കോട്ടയം സ്വദേശി ആയുഷ് ഷാജി എന്നിവരാണ് മരിച്ചത്. മൂന്ന് പേരെ നാട്ടുകാര് ചേര്ന്ന് പുറത്തെടുത്തു. ബാക്കിയുള്ളവരെ ഫയര്ഫോഴ്സ് ഉള്പ്പെടെ എത്തി വണ്ടി വെട്ടിപ്പൊളിച്ചാണ് പുറത്തെടുത്തത്.
കാറില് 11 പേരുണ്ടായിരുന്നു. മറ്റു ആറു പേര് ചികിത്സയില് തുടരുകയാണ്. ഇതില് രണ്ട്പേരുടെ നില ഗുരുതരമാണ്. ബസ് യാത്രക്കാരായ രണ്ട് സ്ത്രീകളും ചികിത്സയിലുണ്ട്. വാടകയ്ക്ക് എടുത്ത ടവേര കാറിലായിരുന്നു സംഘം യാത്ര ചെയ്തത്. അതേസമയം മരിച്ച അഞ്ച് മെഡിക്കല് വിദ്യാര്ത്ഥികളുടെയും പോസ്റ്റ് മോര്ട്ടം ഇന്ന് രാവിലെ വണ്ടാനം മെഡിക്കല് കോളേജ് ആശുപത്രിയില് നടക്കും. മെഡിക്കല് കോളേജിലെ പൊതുദര്ശനത്തിന് ശേഷമാകും മൃതദേഹം ബന്ധുക്കള്ക്ക് വിട്ടു നല്കുക.
)
Facebook
Twitter
