സിപിഎം മംഗലപുരം മുന് ഏരിയ സെക്രട്ടറി മധു മുല്ലശ്ശേരി ബിജെപിയിലേക്ക്. രാവിലെ 11 മണിക്ക് ബിജെപി നേതാക്കള് മധുവിന്റെ വീട്ടില് എത്തി ഔദ്യോഗികമായി ക്ഷണിക്കും. തുടര്ന്ന് അംഗത്വം സ്വീകരിക്കുമെന്നാണ് സൂചന. ഇന്നലെ രാത്രി വൈകി മധു മുല്ലശ്ശേരി ബിജെപി സംസ്ഥാന നേതൃത്വവുമായി ചര്ച്ച നടത്തിയിരുന്നു.
മംഗലപുരം ഏരിയാ കമ്മിറ്റിയിലെ വിഭാഗീയതയില് അച്ചടക്ക നടപടി സ്വീകരിക്കാനിരിക്കെയാണ് മധു പാര്ട്ടി വിടുന്നത്. മധു മുല്ലശ്ശേരിക്കെതിരെ ഗുരുതര ആരോപണങ്ങളുമായി സിപിഎം നേതൃത്വം രംഗത്തെത്തിയിരുന്നു. മധു മുല്ലശേരിക്ക് എതിരെ 70 പരാതികള് ലഭിച്ചിട്ടുണ്ടെന്ന് തിരുവനന്തപുരം ജില്ലാ സെക്രട്ടറി വി ജോയ് പറഞ്ഞു. പേരെടുത്ത് പാര്ട്ടി സഖാക്കള് എഴുതിയ കത്തുകളാണ് ലഭിച്ചതെന്നും ജോയ് പറഞ്ഞു.
സാമ്പത്തിക ക്രമക്കേട് ആരോപണം ഉന്നയിച്ച മധു മുല്ലശേരിക്കെതിരെ നിയമനടപടി സ്വീകരിക്കാനൊരുങ്ങുകയാണ് ജില്ലാ നേതൃത്വം. സിവിലായും ക്രിമിനലായും കേസ് നല്കും. ഇന്നലെ ചേര്ന്ന ജില്ലാ സെക്രട്ടറിയേറ്റ് നിയമ നടപടി സ്വീകരിക്കാന് അനുമതി നല്കിയിട്ടുണ്ടെന്നും ജോയ് പറഞ്ഞു.
തുടര്ച്ചയായി സാമ്പത്തികവും സംഘടനാവിരുദ്ധവുമായ പരാതികള് ജില്ലാ നേതൃത്വത്തിന് ലഭിച്ചിരുന്നു. തുടര്ന്നാണ് ഏരിയാ സെക്രട്ടറിയായി മൂന്നാം ഊഴം നല്കേണ്ടതില്ലെന്ന് ജില്ലാ നേതൃത്വം തീരുമാനിച്ചത്. ഏരിയാ സെക്രട്ടറി സ്ഥാനത്തേക്കുളള അഭിപ്രായ വോട്ടെടുപ്പില് പരാജയപ്പെട്ടതോടെയാണ് മധു സമ്മേളനത്തില് നിന്നും തുടര്ന്ന് പാര്ട്ടിയില് നിന്നും പുറത്തുപോകുന്നത്.
Facebook
Twitter
