വില്‍പ്പത്രക്കേസില്‍ കെ ബി ഗണേഷ് കുമാറിന് അനുകൂലമായി ഫൊറന്‍സിക് റിപ്പോര്‍ട്ട്. വില്‍പത്രത്തിലെ ഒപ്പ് പിതാവ് ആര്‍ ബാലകൃഷ്ണ പിള്ളയുടേതെന്ന് ഫൊറന്‍സിക് പരിശോധനയില്‍ കണ്ടെത്തി. ഒപ്പുകളെല്ലാം ആര്‍. ബാലകൃഷ്ണപിള്ളയുടേതാണെന്നാണ് കണ്ടെത്തിയിരിക്കുന്നത്. റിപ്പോര്‍ട്ട് വന്നതിന് പിന്നാലെ വിശദമായ റിപ്പോര്‍ട്ട് കോടതിയില്‍ നല്‍കിയിട്ടുണ്ട്.
കെ ബി ഗണേഷ്‌കുമാര്‍ വില്‍പ്പത്രം വ്യാജമായി നിര്‍മ്മിച്ചു എന്നായിരുന്നു ആരോപണം. അച്ഛന്‍ ബാലകൃഷ്ണപിള്ളയുടെ സ്വത്ത് തട്ടിയെടുക്കാന്‍ ഗണേഷ് കുമാര്‍ ശ്രമിച്ചു എന്നായിരുന്നു കേസ്. സഹോദരി ഉഷാ മോഹന്‍ദാസ് ആയിരുന്നു പരാതിക്കാരി. തുടര്‍ന്നാണ് കൊട്ടാരക്കര മുന്‍സിഫ് കോടതി വില്‍പത്രത്തിലെ ഒപ്പുകള്‍ ഫൊറന്‍സിക് പരിശോധനയ്ക്കായി സ്റ്റേറ്റ് ഫൊറന്‍സിക് സയന്‍സ് ലബോറട്ടറിക്ക് നല്‍കിയത്.
ഇന്നലെ ഫൊറന്‍സിക് പരിശോധനയ്ക്ക് ശേഷം വിശദമായ റിപ്പോര്‍ട്ട് കോടതിയില്‍ നല്‍കി. ഈ ഒപ്പുകളെല്ലാം ആര്‍. ബാലകൃഷ്ണപിള്ളയുടേതാണെന്നാണ് കണ്ടെത്തല്‍. ആര്‍. ബാലകൃഷ്ണപിള്ള നേരത്തെ ബാങ്കിടപാടുകളില്‍ നടത്തിയ ഒപ്പുകള്‍, കേരള മുന്നോക്ക ക്ഷേമ കോര്‍പറേഷനില്‍ ചെയര്‍മാന്‍ ആയിരിക്കുമ്പോഴുള്ള രേഖകളിലെ ഒപ്പുകള്‍, തിരഞ്ഞെടുപ്പുകള്‍ക്ക് നോമിനേഷന്‍ നല്‍കിയപ്പോഴുള്ള ഒപ്പുകള്‍ എന്നിവ ഫൊറന്‍സിക് സംഘം പരിശോധിച്ചു. അങ്ങനെയാണ് വില്‍പത്രത്തിലെ ഒപ്പും എല്ലാം ഒന്നാണെന്ന് കണ്ടെത്തിയത്.
Facebook
Twitter
