രാജ്യത്ത് അനധികൃതമായി തുടരുന്ന പ്രവാസികള്‍ക്ക് നിയമപരമായി തങ്ങളുടെ രാജ്യങ്ങളിലേക്ക് തിരികെ മടങ്ങുന്നതിന് അവസരമൊരുക്കുന്നതിനായി ഖത്തര്‍ ആഭ്യന്തര മന്ത്രാലയം മൂന്ന് മാസത്തെ പൊതുമാപ്പ് കാലാവധി പ്രഖ്യാപിച്ചു. ഫെബ്രുവരി 8-നാണ് ഖത്തര്‍ ആഭ്യന്തര മന്ത്രാലയം ഇത് സംബന്ധിച്ച അറിയിപ്പ് നല്‍കിയത്. ഇത് പ്രകാരം ഖത്തറിലെ പ്രവാസികളുമായി ബന്ധപ്പെട്ട എന്‍ട്രി, എക്‌സിറ്റ്, റെസിഡന്‍സി തുടങ്ങിയവ നിയന്ത്രിക്കുന്നതിനുള്ള '21/ 2015' എന്ന നിയമം ലംഘിച്ചിട്ടുള്ളവര്‍ക്ക് നിയമപരമായി ഖത്തറില്‍ നിന്ന് മടങ്ങുന്നതിന് ഈ പൊതുമാപ്പ് കാലാവധി ഉപയോഗപ്പെടുത്താവുന്നതാണ്. മൂന്ന് മാസത്തെ ഈ പൊതുമാപ്പ് കാലാവധി 2025 ഫെബ്രുവരി 9, ഞായറാഴ്ച മുതല്‍ ഖത്തറില്‍ പ്രാബല്യത്തില്‍ വരുന്നതാണ്. എന്‍ട്രി വിസ കാലാവധി അവസാനിച്ച ശേഷവും ഖത്തറില്‍ തുടരുന്നവര്‍ റെസിഡന്‍സി നിയമങ്ങള്‍ ലംഘിച്ചിട്ടുള്ളവര്‍ തുടങ്ങിയ വിഭാഗങ്ങള്‍ക്ക് ഈ പദ്ധതി പ്രയോജനപ്പെടുത്താവുന്നതാണ്.
ഈ പദ്ധതിയുടെ കീഴില്‍ ഖത്തറില്‍ നിന്ന് നിയമപരമായി തിരികെ മടങ്ങുന്നതിന് ആഗ്രഹിക്കുന്ന റെസിഡന്‍സി നിയമങ്ങള്‍ ലംഘിച്ചിട്ടുള്ള വ്യക്തികള്‍ക്ക് ഹമദ് ഇന്റര്‍നാഷണല്‍ എയര്‍പോര്‍ട്ടിലോ അല്ലെങ്കില്‍ സല്‍വ റോഡിലുള്ള സെര്‍ച്ച് ആന്‍ഡ് ഫോളോഅപ്പ് ഡിപ്പാര്‍ട്‌മെന്റിലോ (ഉച്ചയ്ക്ക് 1 മണിമുതല്‍ രാത്രി 9 മണിവരെ) നേരിട്ടെത്തി പൊതുമാപ്പ് കാലാവധി പ്രയോജനപ്പെടുത്താവുന്നതാണ്.
Facebook
Twitter
