തൊടുപുഴ പുറപ്പുഴയില്‍ ഭര്‍ത്താവ് ബലം പ്രയോഗിച്ച് വിഷം കുടിപ്പിച്ചതിനെ തുടര്‍ന്ന് ചികിത്സയിലായിരുന്ന യുവതി മരിച്ചു. പുറപ്പുഴ ആനിമൂട്ടില്‍ സ്വദേശി ജോര്‍ളിയാണ് മരിച്ചത്. ഭര്‍ത്താവ് ടോണി മാത്യുവിനെ പൊലീസ് അറസ്റ്റ് ചെയ്തു.
മരണത്തിന് മുമ്പ് മജിസ്‌ട്രേറ്റിന് നല്‍കിയ മൊഴിയില്‍ ഭര്‍ത്താവ് ബലംപ്രയോഗിച്ച് വിഷം നല്‍കിയെന്ന് ജോര്‍ളി തന്നെയാണ് വെളിപ്പടുത്തിയത്. ജൂണ്‍ 26നാണ് ജോര്‍ളിയെ വിഷം ഉള്ളില്‍ച്ചെന്ന നിലയില്‍ ആശുപത്രിയില്‍ പ്രവേശിപ്പിച്ചത്. ജൂലായ് മൂന്നിനാണ് യുവതി മരിച്ചത്.
ഇരുവരും തമ്മില്‍ നിരന്തരം തര്‍ക്കങ്ങള്‍ ഉണ്ടാകാറുണ്ടായിരുന്നു. തടിപ്പണിക്കാരനായ ടോണി സ്ഥിരം മദ്യപാനിയാണ്. സ്ത്രീധനത്തുകയടക്കം ഇയാള്‍ മദ്യപാനത്തിനായി ഉപയോഗിച്ചിരുന്നുവെന്നാണ് വിവരം. ഒരു ദിവസം ഇരുവരും തമ്മിലുണ്ടായ തര്‍ക്കത്തിനിടയില്‍ ടോണി ജോര്‍ളിയോട് വിഷം കുടിക്കാന്‍ ആവശ്യപ്പെട്ടിരുന്നു. അല്ലെങ്കില്‍ നിര്‍ബന്ധിച്ച് കുടിപ്പിക്കുമെന്നും ഭീഷണിപ്പെടുത്തി. തുടര്‍ന്ന് ബലം പ്രയോഗിച്ച് ഭര്‍ത്താവ് വിഷം നല്‍കിയെന്നാണ് ജോര്‍ളി മൊഴി നല്‍കിയത്. ഇരുവരുടെയും പതിനാല് വയസുകാരിയായ മകള്‍ കണ്ടുകൊണ്ടിരിക്കെയായിരുന്നു ടോണി ജോര്‍ളിക്ക് വിഷം നല്‍കിയത്.
Facebook
Twitter
