എന്എച്ച്എസിനെ പ്രതിസന്ധിയിലാക്കി വീണ്ടും ബ്രിട്ടീഷ് മെഡിക്കല് അസോസിയേഷന്റെ നേതൃത്വത്തില് റെസിഡന്റ് ഡോക്ടര്മാരുടെ പണിമുടക്ക് ഇന്ന് തുടങ്ങും. ജനങ്ങളെ ബുദ്ധിമുട്ടിക്കാന് താല്പര്യമില്ലെങ്കിലും പണിമുടക്കാതെ വഴിയില്ലെന്നാണ് ബിഎംഎ മേധാവി വിശദീകരിക്കുന്നത്. എന്നാല് ആരോഗ്യ മേഖല കടുത്ത പ്രതിസന്ധിയിലിരിക്കേയുള്ള സമര തീരുമാനത്തില് വന് വിമര്ശനമുയരുകയാണ്.
2008-നെ അപേക്ഷിച്ച് ഡോക്ടര്മാര്ക്ക് ലഭിക്കുന്ന തുക വളരെ കുറവാണെന്നും, ഇത് മാന്യമായ ശമ്പളമാക്കുന്നതിന് വേണ്ടിയാണ് സമരമെന്നുമാണ് ഡോക്ടര്മാരുടെ വിശദീകരണം.
വര്ഷങ്ങളായി നഷ്ടമായ ശമ്പളത്തെ സംബന്ധിച്ചുള്ള തര്ക്കമാണ് നിലനില്ക്കുന്നതെന്ന് ബിഎംഎ ചെയര് ഡോ. ടോം ഡോള്ഫിന് പറഞ്ഞു. മറ്റ് പബ്ലിക് സെക്ടര് ജോലിക്കാരെ അപേക്ഷിച്ച് റസിഡന്റ് ഡോക്ടര്മാര് ഏറെ പിന്നിലാണെന്നാണ് ഇദ്ദേഹത്തിന്റെ നിലപാട്.
ഹെല്ത്ത് സെക്രട്ടറി ശമ്പളവര്ധനയില് വാഗ്ദാനങ്ങള് നല്കുന്നുണ്ടെങ്കിലും നടപടിയുണ്ടാകുന്നില്ലെന്ന് ഡോ. ഡോള്ഫിന് ചൂണ്ടിക്കാണിച്ചു. എന്നാല് കഴിഞ്ഞ വര്ഷം 29% വര്ധനയാണ് ഡോക്ടര്മാര്ക്ക് ലഭിച്ചതെന്ന് ഗവണ്മെന്റ് വാദിക്കുന്നു. പൊതുമേഖലയിലെ ഏറ്റവും വലിയ വര്ധനവാണ് ലേബര് ഗവണ്മെന്റ് നല്കിയതെന്നും എന്നിട്ടും സമരത്തിനിറങ്ങുന്നത് തെറ്റായ പ്രവണതയാണെന്നും സര്ക്കാര് പറയുന്നു.
രൂക്ഷമായിട്ടാണ് ഹെല്ത്ത് സെക്രട്ടറി സമരത്തെ വിമര്ശിച്ചിട്ടുള്ളത്.. കൂടാതെ യൂണിയന്റെ നിലപാട് ഭാവി എന്എച്ച്എസിനെ അപകടത്തിലാക്കുമെന്നും സ്ട്രീറ്റിംഗ് കുറ്റപ്പെടുത്തുന്നു.
Facebook
Twitter
