യുകെയിലെ ഭവനഉടമകള്‍ക്ക് ചങ്കിടിപ്പ് സമ്മാനിച്ച് മോര്‍ട്ട്‌ഗേജ് നിരക്കുകള്‍ വര്‍ദ്ധിക്കാനുള്ള വഴിയൊരുങ്ങുന്നു. ഉയര്‍ന്ന പണപ്പെരുപ്പം, പലിശ നിരക്ക് വര്‍ദ്ധന പ്രതീക്ഷകള്‍ എന്നിവ ചേര്‍ന്ന് ആഗോള ബോണ്ട് വിപണിയില്‍ ആശങ്ക സൃഷ്ടിക്കുന്നതാണ് തിരിച്ചടിയാകുന്നത്.
ലെന്‍ഡര്‍മാര്‍ മോര്‍ട്ട്‌ഗേജ് നിരക്ക് നിശ്ചയിക്കാന്‍ ഉപയോഗിക്കുന്ന യുകെ സ്വാപ് റേറ്റുകള്‍ മൂന്ന് വര്‍ഷത്തെ ഉയര്‍ന്ന നിലയിലാണുള്ളത്. ആഗോള തലത്തില്‍ ഈയാഴ്ച ബോണ്ട് വിപണിയില്‍ വിറ്റൊഴിയല്‍ പ്രതിഭാസമാണ് അരങ്ങേറുന്നത്. ഇതിന്റെ അലയടികള്‍ അധികം വൈകാതെ സമ്പദ് വ്യവസ്ഥയിലും വന്നുചേരും.
അഞ്ച് വര്‍ഷത്തെ സ്വാപ് റേറ്റ് ബുധനാഴ്ച 4.52 ശതമാനത്തിന് മുകളിലെത്തി. 2023 ഒക്ടോബറിന് ശേഷമുള്ള ഉയര്‍ന്ന നിരക്കാണിത്. യുകെ ഗവണ്‍മെന്റിന്റെ 10 വര്‍ഷത്തെ കടത്തിന്മേലുള്ള യീല്‍ഡ് 2008ന് ശേഷം ഉയര്‍ന്ന നിലയിലാണ്.
ഇത് പലിശ നിരക്കുകളെ സ്വാധീനിക്കാന്‍ സാധ്യതയുള്ള ഘടകങ്ങളാണ്. ഫിക്‌സഡ് ടേം മോര്‍ട്ട്‌ഗേജ് നിരക്ക് ഉയരാനുള്ള അവസ്ഥകള്‍ പരുവപ്പെട്ടതായി വിദഗ്ധര്‍ ചൂണ്ടിക്കാണിച്ചു. യുഎസ്, ഇറാന്‍ വെടിനിര്‍ത്തല്‍ ലംഘിച്ച് വീണ്ടും ഈയാഴ്ച വെടിപൊട്ടിയതോടെ എണ്ണ വില കുതിച്ചുയര്‍ന്നിരുന്നു.
ഇത് പണപ്പെരുപ്പം ഉയരാനുള്ള സാധ്യതയിലേക്ക് നയിക്കുമെന്നാണ് ആശങ്ക. ഇതോടെ നിക്ഷേപകര്‍ ബോണ്ടുകള്‍ വിറ്റൊഴിഞ്ഞതാണ് പലിശ നിരക്കുകള്‍ വര്‍ദ്ധിപ്പിക്കുന്നത്. ഗവണ്‍മെന്റ് കടമെടുപ്പ് നിരക്ക് ഉയര്‍ന്ന് തുടര്‍ന്നാല്‍ ഇത് ജീവിതച്ചെലവ് പ്രതിസന്ധി പരിഹരിക്കാന്‍ വാഗ്ദാനം ചെയ്ത പ്രധാനമന്ത്രി ആന്‍ഡി ബേണ്‍ഹാമിന് തിരിച്ചടിയാകും.
Facebook
Twitter
