സംഭാവനകളുമായി ബന്ധപ്പെട്ട വിവാദങ്ങള്‍ കത്തിനില്‍ക്കുന്നതിനിടെ നെയ്ജല്‍ ഫരാജിന്റെ റിഫോം യു കെ പാര്‍ട്ടിക്ക് വീണ്ടും 36 മില്യന്‍ പൗണ്ടിന്റെ വന്‍ സംഭാവന. 48 മണിക്കൂറിനുള്ളില്‍ പാര്‍ട്ടിക്ക് ലഭിക്കുന്ന രണ്ടാമത്തെ വലിയ സംഭാവനയാണിത്.
ക്രിപ്‌റ്റോകറന്‍സി ശതകോടീശ്വരനായ ക്രിസ്റ്റഫര്‍ ഹാര്‍ബോണ്‍ റിഫോം യു കെയ്ക്ക് 36 മില്യന്‍ പൗണ്ട് (ഏകദേശം 49 മില്യന്‍ ഡോളര്‍) സംഭാവന നല്‍കിയതായി കഴിഞ്ഞ ശനിയാഴ്ചയാണ് വെളിപ്പെടുത്തിയത്. ഇതിന് തൊട്ടുമുന്‍പത്തെ ദിവസവും മറ്റൊരാളില്‍നിന്ന് 36 മില്യന്‍ പൗണ്ടിന്റെ സംഭാവന പാര്‍ട്ടിക്ക് ലഭിച്ചിരുന്നു.
ഇതോടെ അടുത്ത പൊതുതെരഞ്ഞെടുപ്പിനുള്ള തയ്യാറെടുപ്പുകള്‍ നടത്തുന്ന റിഫോം യു കെയ്ക്ക് രണ്ട് വ്യക്തികളില്‍നിന്നായി 48 മണിക്കൂറിനിടെ ലഭിച്ചത് 72 മില്യന്‍ പൗണ്ട്. പാര്‍ട്ടിയുടെ സാമ്പത്തിക ഇടപാടുകളില്‍ ക്രമക്കേടുണ്ടെന്ന ആരോപണങ്ങള്‍ നിലനില്‍ക്കുന്നതിനിടെയാണ് ഇത്രയും വലിയ തുക ലഭിച്ചിരിക്കുന്നത്. എന്നാല്‍ ആരോപണങ്ങളെല്ലാം റിഫോം യു കെ ശക്തമായി നിഷേധിച്ചു.
കഴിഞ്ഞ പൊതുതെരഞ്ഞെടുപ്പില്‍ ഭരണകക്ഷിയായ ലേബര്‍ പാര്‍ട്ടിയും പ്രധാന പ്രതിപക്ഷമായ കണ്‍സര്‍വേറ്റീവ് പാര്‍ട്ടിയും ചെലവഴിച്ചതിനേക്കാള്‍ വലിയ തുകയാണ് രണ്ട് ദിവസത്തിനിടെ റിഫോം യു കെയ്ക്ക് സംഭാവനയായി ലഭിച്ചതെന്നാണ് റിപ്പോര്‍ട്ട്.
റിഫോം യു കെയിലേക്ക് ഒഴുകുന്ന വന്‍ സംഭാവനകള്‍ ലേബര്‍ പാര്‍ട്ടിയിലും ആശങ്ക സൃഷ്ടിച്ചിട്ടുണ്ട്. റിഫോം പാര്‍ട്ടിയുടെ സാമ്പത്തിക ശേഷിയോട് പിടിച്ചുനില്‍ക്കാന്‍ പാര്‍ട്ടി അംഗങ്ങളോട് കൂടുതല്‍ സംഭാവന നല്‍കണമെന്ന് ലേബര്‍ നേതൃത്വം ആവശ്യപ്പെട്ടു.
Facebook
Twitter
