ഭാര്യക്ക് മറ്റൊരാളുമായി ബന്ധമുണ്ടെന്നാരോപിച്ച് ഭാര്യയെ കൊലപ്പെടുത്തി മൃതദേഹം വീടിനുള്ളില്‍ കുഴിച്ചിട്ട 48 കാരന്‍ അറസ്റ്റില്‍. ഉത്തര്‍പ്രദേശിലെ ബഹ്റൈച്ചിലാണ് സംഭവം. ഭാര്യ ഫൂലം ദേവിയാണ് മരിച്ചത്. സംഭവത്തില്‍ ഹരികിഷന്‍ എന്ന പ്രതിയെ അറസ്റ്റ് ചെയ്തു.ഒക്ടോബര്‍ 6 ന് ആണ് യുവതിയെ കാണാതാകുന്നത്. ഇതെത്തുടര്‍ന്ന്, സഹോദരന്‍ ഒക്ടോബര്‍ 13 ന് പൊലീസില്‍ പരാതി നല്‍കി.
ഇതിന് ശേഷം, കഴിഞ്ഞ വെള്ളിയാഴ്ച സ്ത്രീയുടെ സഹോദരന്‍ പ്രതിയുടെ കട്ടിലിനടിയില്‍ പുതുതായി ഒരു കുഴി കുഴിച്ചതായി ശ്രദ്ധയില്‍പ്പെട്ടിരുന്നു. ഇത് അദ്ദേഹം ഉടന്‍ തന്നെ പൊലീസില്‍ അറിയിക്കുകയും ചെയ്തിരുന്നു. ഇതിന് ശേഷം പൊലീസെത്തി മുറിയില്‍ കുഴിച്ചെടുത്ത് നോക്കിയപ്പോള്‍ ഫൂലം ദേവിയുടെ അഴുകിയ മൃതദേഹം കണ്ടെടുക്കുകയായിരുന്നു. ആറടി താഴ്ച്ചയില്‍ കുഴിച്ചിട്ട നിലയിലായിരുന്നു മൃതദേഹം. എന്നാല്‍ പൊലീസ് എത്തിയപ്പോഴേക്കും പ്രതി വീട്ടില്‍ നിന്ന് ഓടി രക്ഷപ്പെട്ടിരുന്നുവെന്ന് പൊലീസ് പറഞ്ഞു.
പിന്നീട് പൊലീസ് പ്രതിയെ കണ്ടെത്തുകയായിരുന്നു. ഇയാള്‍ ഹരിയാനയില്‍ കൂലിപ്പണിക്കാരനായിരുന്നു. ഒരു അവധിക്ക് തിരിച്ചെത്തിയപ്പോഴാണ് സ്ഥലത്തെ ഗുഡ്ഡു എന്നയാളുമായി ഭാര്യ പ്രണയത്തിലാണെന്നറിഞ്ഞതെന്നും ഇതിലുള്ള പകയാണ് കൊലക്ക് കാരണമായതെന്നും പ്രതി സമ്മതിച്ചു.പ്രതിയെ കോടതിയില്‍ ഹാജരാക്കി ജയിലിലേക്ക് അയച്ചതായി പൊലീസ് കൂട്ടിച്ചേര്‍ത്തു.
Facebook
Twitter
