യുഎസില് പ്രതിദിന കൊറോണ മരണത്തിലും പ്രതിദിനം റിപ്പോര്ട്ട് ചെയ്യപ്പെടുന്ന കൊറോണ രോഗികളുടെ എണ്ണത്തില് വെള്ളിയാഴ്ചത്തെ പോലെ ഇന്നലെയും കുറവുണ്ടായിരിക്കുന്നുവെന്നത് കടുത്ത ആശ്വാസമേകുന്നു. ഏറ്റവും പുതിയ കണക്കുകള് പ്രകാരം ഇന്നലെ 1161 പുതിയ മരണങ്ങളാണ് സ്ഥിരീകരിച്ചിരിക്കുന്നത് തൊട്ട് മുമ്പത്തെ ദിവസം അതായത് ശനിയാഴ്ചത്തെ പ്രതിദിന കൊറോണ മരണങ്ങളായ 1,672 മായി താരതമ്യപ്പെടുത്തുമ്പോള് ഇന്നലത്തെ മരണങ്ങളില് ഇടിവുണ്ടായത് ആശ്വാസമേകുന്നു.
കഴിഞ്ഞ 24 മണിക്കൂറിനിടെ സ്ഥിരീകരിച്ച പുതിയ കൊറോണ രോഗികളുടെ എണ്ണം 28,028 ആണ്. ശനിയാഴ്ച പുതിയ 29,504 രോഗികളും വെള്ളിയാഴ്ച 32,217 രോഗികളും വ്യാഴാഴ്ച 32,397 പുതിയ രോഗികളുമാണ് സ്ഥിരീകരിക്കപ്പെട്ടതെന്നതിനാല് ഇന്നലെ ഇക്കാര്യത്തിലും കുറവുണ്ടായത് പ്രതീക്ഷ വര്ധിപ്പിച്ചിരിക്കുന്നു. രാജ്യത്തെ മൊത്തം കൊറോണ മരണങ്ങള് 68,609 ആയാണ് പെരുകിയിരിക്കുന്നത്. മൊത്തം രോഗികളുടെ എണ്ണം 1,189,024 ആയാണ് വര്ധിച്ചിരിക്കുന്നത്. രോഗത്തില് നിന്നും മുക്തി നേടിയ യുഎസുകാരുടെ എണ്ണം 178,671 ആയാണുയര്ന്നത്.എന്നാല് ലോകത്തില് കൊറോണ ബാധിച്ച് ഏറ്റവും കൂടുതല് പേര് മരിച്ചിരിക്കുന്നതും ഏറ്റവും കൂടുതല് രോഗികളുള്ളതുമായ രാജ്യമെന്ന ദുരവസ്ഥയില് നിന്നും ഇനിയും യുഎസിന് മുക്തിയുണ്ടായിട്ടില്ല.
ഏറ്റവും പുതിയ റിപ്പോര്ട്ടുകള് അനുസരിച്ച് 24,648 മരണങ്ങളും 323,883 രോഗികളുമായി ന്യൂയോര്ക്കിലാണ് ഏറെ വഷളായ അവസ്ഥയുള്ളത്.ന്യൂജഴ്സിയില് 7,886 മരണങ്ങളുണ്ടായപ്പോള് ഇവിടെ മൊത്തം 127,438 പേര്ക്കാണ് രോഗബാധയുണ്ടായിരിക്കുന്നത്.മസാച്ചുസെറ്റ്സില് കോവിഡ് ബാധിച്ച് 68,087 പേര് രോഗികളായപ്പോള് 4,004 പേരാണ് മരിച്ചത്.ഇല്ലിനോയ്സില് കൊറോണ മരണങ്ങള് 2,618 ഉം രോഗികളുടെ എണ്ണം 61,499 ഉം ആണ്.പെന്സില് വാനിയയില് രോഗികളുടെ എണ്ണം 52,048 ഉം മരണം 2,832ഉം ആണ്.മിച്ചിഗനില് 4,049 പേര് മരിക്കുകയും 43,754 പേര് രോഗബാധിതരാവുകയും ചെയ്തിരിക്കുന്നു. ഇവയ്ക്ക് പുറമെ രാജ്യത്തെ എല്ലാ സ്റ്റേറ്റുകളിലും കൊറോണ മരണങ്ങളും പുതിയ കേസുകളും അനുദിനം റിപ്പോര്ട്ട് ചെയ്യപ്പെടുന്നുമുണ്ട്.