ലക്ഷക്കണക്കിന് ഉപഭോക്താക്കളെ തേടി വമ്പന് മിഡ്-കോണ്ട്രാക്ട് നിരക്ക് വര്ദ്ധനവുകള് വരുന്നു. ഇതല്ലെങ്കില് എക്സിറ്റ് ഫീസ് ഇനത്തില് വലിയ ചെലവ് വഹിക്കേണ്ടി വരുമെന്ന അവസ്ഥയാണുള്ളതെന്ന് കണ്സ്യൂമര് ഗ്രൂപ്പ്- വിച്ച്? മുന്നറിയിപ്പ് നല്കി.
ഒന്നുകില് മിഡ്-കോണ്ട്രാക്ട് നിരക്ക് വര്ദ്ധന നേരിടണം, അല്ലെങ്കില് 400 പൗണ്ടിലേറെ എക്സിറ്റ് ഫീസ് നല്കണമെന്ന വിധത്തിലാണ് മൊബൈല് ഫോണ് ഉപയോക്താക്കളുടെ ദുരവസ്ഥയെന്ന് വിച്ച്? വ്യക്തമാക്കി.
ഉപഭോക്താക്കള് വന്തോതില് ജീവിതപ്രതിസന്ധികള് നേരിടുമ്പോള് ഈ നിരക്ക് വര്ദ്ധനവുകള് പുനരാലോചിക്കണമെന്നാണ് സേവനദാതാക്കളോട് വിച്ച്? ആവശ്യപ്പെടുന്നത്. 2023-ല് പണപ്പെരുപ്പത്തെ നേരിടാന് പ്രഖ്യാപിച്ചിട്ടുള്ള നിരക്ക് വര്ദ്ധനവുകളും ഒഴിവാക്കാനാണ് സ്ഥാപനങ്ങളോട് ഗ്രൂപ്പിന്റെ ഉപദേശം.
മിഡ്-കോണ്ട്രാക്ട് വര്ദ്ധന മൂലം കോണ്ട്രാക്ട് ഉപേക്ഷിക്കാന് പെനാല്റ്റി ഫീസ് നല്കേണ്ടി വരുന്ന അവസ്ഥ ഒഴിക്കാനും വിച്ച്? ആവശ്യപ്പെടുന്നു. നാല് വമ്പന് മൊബൈല് സ്ഥാപനങ്ങളായ ഇഇ, ഒ2, ത്രീ, വോഡാഫോണ് എന്നിവര് ഏപ്രില് മാസത്തില് പണപ്പെരുപ്പത്തിന് ആനുപാതികമായി നിരക്ക് വര്ദ്ധിപ്പിക്കാറുണ്ട്.