കോവിഡ് പ്രതിസന്ധിയില്‍ ലോകം മുഴുവന്‍ വിറങ്ങലിച്ചുനില്‍ക്കുകയാണ്. രോഗ വ്യാപനം തടയാനായി നീണ്ട ലോക്ക്ഡൗണ്‍ ഏര്‍പ്പെടുത്തിയിരിക്കുകയായിരുന്നു പല രാജ്യങ്ങളും. മാസങ്ങള്‍ നീണ്ട ലോക്ക്ഡൗണ്‍ നാളുകളും വാക്‌സിനേഷനും കോവിഡ് പ്രതിരോധത്തെ ഒരു പരിധിവരെ സഹായിക്കുകയും ചെയ്തു. എന്നാല്‍ ഈ അടച്ചുപൂട്ടലുകള്‍ അവസാനിപ്പിക്കാന്‍ സമയമായെന്ന് ഓസ്‌ട്രേലിയന്‍ പ്രധാനമന്ത്രി സ്‌കോട്ട് മൊറിസണ്‍ വ്യക്തമാക്കുന്നു.
നീണ്ട അടച്ചിടലുകള്‍ ജനങ്ങളുടെ മാനസിക ആരോഗ്യത്തെ മോശമായി ബാധിക്കുന്നു, പ്രത്യേകിച്ച് പുതു തലമുറയുടെ. കുട്ടികളുടെ വിദ്യാഭ്യാസം, കുടുംബം, ജോലി , സാമ്പത്തികം അങ്ങനെ എല്ലാ മേഖലകളേയും അടച്ചിടലുകള്‍ മോശമായി ബാധിച്ചിരിക്കുകയാണ്. ഇനിയും അടച്ചിടലുകള്‍ പ്രതിസന്ധി വര്‍ദ്ധിപ്പിക്കുമെന്നും പ്രധാനമന്ത്രി പറഞ്ഞു.
രാജ്യത്തിന്റെ സാമ്പത്തിക സ്ഥിതിയേയും ലോക്ക്ഡൗണ്‍ കാര്യമായി ബാധിക്കും. വാണിജ്യ രംഗത്തും ടൂറിസം ഉള്‍പ്പെടെ മേഖലകളിലും തിരിച്ചടി നേരിടുകയാണ്. അതിനാല്‍ തന്നെ ഇനിയും ഈ രീതികള്‍ തുടരാനാവില്ലെന്നാണ് അദ്ദേഹത്തിന്റെ നിലപാട്.
എന്നാല്‍ കോവിഡ് ഇടവേളയ്ക്ക് ശേഷം വീണ്ടും പിടിമുറുക്കിയ ഈ അവസരത്തില്‍ ഇളവു നല്‍കുന്നത് ഇത്രയും കാലം നടത്തിയ പ്രതിരോധത്തിന് മങ്ങലേല്‍പ്പിക്കുമെന്നാണ് ആരോഗ്യ വിദഗ്ധര്‍ പറയുന്നത്. ജാഗ്രത പുലര്‍ത്തേണ്ട സമയമാണെന്നും കോവിഡ് വകഭേദം രാജ്യത്തെ മോശമായി ബാധിച്ചു തുടങ്ങിയെന്നും അതിനാല്‍ കരുതല്‍ വേണമെന്നുമാണ് ഇവര്‍ നല്‍കുന്ന മുന്നറിയിപ്പ്.
Facebook
Twitter
