മുടി കൊഴിച്ചില് രൂക്ഷം ; വര്ഷങ്ങള് നീണ്ട ചികിത്സയില് ഫലമുണ്ടായില്ല ; ഡോക്ടറുടെ പേരെഴുതിവച്ച് യുവാവ് ആത്മഹത്യ ചെയ്തു
മുടി കൊഴിച്ചില് അസഹനീയമായതില് മനംനൊന്ത് യുവാവ് ജീവനൊടുക്കി. കോഴിക്കോട് നോര്ത്ത് കന്നൂര് സ്വദേശി പ്രശാന്ത് ആണ് കഴിഞ്ഞ മാസം വീട്ടില് തൂങ്ങി മരിച്ചത്. ആത്മഹത്യാ കുറിപ്പില് ചികിത്സിച്ച ഡോക്ടറുടെയും പേര് പരാമര്ശിച്ചിട്ടുണ്ട്. സംഭവത്തില് പോലീസ് അന്വേഷണം നടത്തി വരികയാണ്. അതേസമയം, അന്വേഷണത്തില് തൃപ്തിയില്ലെന്ന് പ്രശാന്തിന്റെ കുടുംബം ആരോപിച്ച് രംഗത്ത് വന്നു. ഇതോടെയാണ് പ്രശാന്തിന്റെ മരണം പുറംലോകത്തേയ്ക്ക് എത്തിയത്.
ഒക്ടോബര് ഒന്നിന് മരണത്തിന്റെ ഉത്തരവാദി മുടി കൊഴിച്ചിലിന് ചികിത്സിച്ച ഡോക്ടര് ആണെന്നും പുറത്തിറങ്ങാന് പോലും കഴിയാത്തതിനാല് മരിക്കുന്നുവെന്നും കുറിപ്പ് എഴുതി വെച്ച് ആത്മഹത്യ ചെയ്യുകയായിരുന്നു. കഴിഞ്ഞ കുറിച്ച് കാലമായി മുടി കൊഴിയുന്നതിന്റെ വലിയ മനോവിഷമത്തിലായിരുന്നു പ്രശാന്ത് എന്ന് കുടുംബം പറയുന്നു. പ്രശാന്തിന്റെ ആത്മഹത്യാ കുറിപ്പില് പറയുന്ന പ്രകാരം 2014 മുതല് കോഴിക്കോട് ക്ലിനിക്കില് ചികിത്സ തേടി.
ഡോക്ടര് മരുന്നും ഗുളികയും നല്കി. അത് കഴിച്ചതിന് ശേഷം പുരികവും മൂക്കിലെ രോമങ്ങളും ദേഹത്തെ രോമങ്ങള് വരെ കൊഴിയാന് തുടങ്ങുകയും ചെയ്തു. ശരിയാകുമെന്ന് പ്രതീക്ഷിച്ച് വീണ്ടും ഡോക്ടറെ കണ്ടു. മരുന്നുകള് കഴിച്ചു. ഫലം ലഭിക്കാതെ വന്നതോടെ പ്രശാന്ത് വീണ്ടും നിരാശനായി. 2020വരെയാണ് ചികിത്സ തുടര്ന്നത്. അത്തോളി പോലീസില് പരാതി നല്കിയെങ്കിലും കേസന്വേഷണത്തില് തൃപ്തിയില്ലെന്നാണ് കുടുംബം പറയുന്നത്. ഡോ. റഫീക്കിനെതിരെയാണ് പരാതി നല്കിയിരിക്കുന്നത്. അതേസമയം കൃത്യമായ ചികിത്സയാണ് നല്കിയതെന്നും വട്ടത്തില് മുടി പോകുന്ന രോഗം പ്രശാന്തിന് ഉണ്ടായിരുന്നുവെന്ന് ഡോക്ടര് വിശദീകരണം നല്കി.