പാകിസ്ഥാനോടുള്ള കലി തീര്‍ത്ത് പാക് തോല്‍വിയുടെ ആഘോഷത്തില്‍ കൂടി ഇര്‍ഫാന്‍ പത്താന്‍; വീഡിയോ വൈറലായതോടെ വിമര്‍ശനം
കിരീട സാധ്യതയില്‍ മുന്നില്‍ ഉള്ള രണ്ട് ടീമുകളെ തകര്‍ത്തെറിഞ്ഞാണ് അഫ്ഗാനിസ്ഥാന്‍ ലോകകപ്പിനെ കൂടുതല്‍ ആവേശകരമാക്കിയത്. ഇംഗ്ലണ്ടിനെ തോല്‍പ്പിച്ചപ്പോള്‍ ഭാഗ്യമെന്ന് കരുതി, എന്നാല്‍ പാകിസ്ഥാനെ തകര്‍ത്തെറിഞ്ഞതോടെ ഇവന്മാര്‍ നിസാരക്കാരല്ല എന്നൊക്കെ എല്ലാവരും സമ്മതിച്ച് കഴിഞ്ഞിരിക്കുന്നു. ടോസ് നഷ്ടപ്പെട്ട് ഫീല്‍ഡിങ്ങിന് ഇറങ്ങിയ ടീം കൃത്യമായ പ്ലാനില്‍ പാകിസ്ഥാനെ തകര്‍ത്തെറിയുക ആയിരുന്നു.
ഒരുപാട് കഷ്ടപാടുകള്‍ക്കും ദുരിതങ്ങള്‍ക്കും ഇടയിലൂടെ കടന്നുപോകുന്ന രാജ്യത്ത് ഇത്തരത്തില്‍ ഒരു ജയം ഉണ്ടാക്കുന്ന ഇമ്പാക്ട് വിശേഷിപ്പിക്കേണ്ടത് ഇല്ലല്ലോ. മത്സരശേഷം തങ്ങളെ സ്റ്റേഡിയത്തില്‍ പിന്തുണച്ച ആളുകള്‍ക്ക് നന്ദി പറയാന്‍ അഫാനിസ്ഥാന്‍ ടീം സ്റ്റേഡിയം വലം വെച്ചു . അവര്‍ സ്റ്റേഡിയത്തില്‍ ആഹ്ലാദത്തില്‍ നൃത്തം ചവിട്ടി. ഇതില്‍ തന്നെ റഷീദ് ഖാനൊപ്പം നൃത്തം ചവിട്ടിയ ഇര്‍ഫാന്‍ പത്താന്റെ വീഡിയോ വൈറലായി.
ഈ ലോകകപ്പില്‍ കമന്റേറ്റര്‍ എന്ന നിലയില്‍ പ്രവര്‍ത്തിക്കുന്ന ഇര്‍ഫാന്‍ പാകിസ്താനെതിരെയുള്ള ഇന്ത്യയുടെ ചരിത്ര ടെസ്റ്റ് വിജയത്തിലും ടി 20 ലോകകപ്പ് ജയിച്ച ടീമിലുമൊക്കെ ഭാഗമായിരുന്നു. ഇന്ത്യന്‍ താരങ്ങള്‍ക്ക് എതിരായിട്ടും ടീമിന് എതിരായിട്ടും ആരെങ്കിലും എന്തെങ്കിലും പറഞ്ഞ് കളിയാക്കിയത് അപ്പോള്‍ തന്നെ മറുപടി നല്‍കുന്നത് ഇര്‍ഫാന്റെ രീതിയാണ്. ഈ ലോകകപ്പില്‍ തങ്ങള്‍ക്ക് ഇന്ത്യയില്‍ അത്ര നല്ല അനുഭവം അല്ല കിട്ടിയത് എന്നൊക്കെ പാകിസ്ഥാന്‍ പറയുമ്പോള്‍ അതിന് കനത്ത ഭാഷയില്‍ തന്നെ മറുപടി നല്‍കിയിട്ടുണ്ട് ഇര്‍ഫാന്‍. പാകിസ്ഥാനില്‍ കളിക്കാന്‍ ചെന്നപ്പോള്‍ തങ്ങള്‍ക്ക് അപമാനിക്കപ്പെട്ടത് എങ്ങനെ ആണെന്ന് ഇര്‍ഫാന്‍ പറഞ്ഞിട്ടുണ്ട്. എന്തായാലും പാകിസ്ഥാന്‍ തോല്‍വി ഇര്‍ഫാന്‍ നന്നായി ആഘോഷിച്ചിട്ടുണ്ട്. വീഡിയോ വൈറലായതോടെ പ്രകോപനപരമെന്ന വിമര്‍ശനവും ഉയരുന്നുണ്ട്.
Facebook
Twitter
