രാമക്ഷേത്ര ഉദ്ഘാടനവുമായി ബന്ധപ്പെട്ട് ബിജെപിയും പ്രധാനമന്ത്രി മോദിയും ലോക്‌സഭാ തെരഞ്ഞെടുപ്പിനുള്ള കരുക്കള്‍ നീക്കുകയാണ്. അതിന്റെ ഭാഗമായി ഇന്ന് അയോധ്യയില്‍ മോദിയുടെ റോഡ് ഷോ നടക്കും. പുതുക്കിയ വിമാനത്താവളവും റെയില്‍വേ സ്റ്റേഷനും പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. 15700 കോടി രൂപയുടെ വികസന പദ്ധതികള്‍ പ്രഖ്യാപിക്കും.
വരാനിരിക്കുന്ന പൊതു തെരഞ്ഞെടുപ്പില്‍ അയോധ്യ ബിജെപിയുടെ മുഖ്യപ്രചാരണവിഷയം ആയിരിക്കും എന്നതില്‍ തര്‍ക്കമില്ല. ആ പ്രചാരണ ശ്രമങ്ങളുടെ തുടക്കമായി ഇന്നത്തെ റോഡ്‌ഷോയെ കാണാം. ശ്രീരാമ കിരീട മാതൃക ചൂടിയ അയോധ്യാ ധാം റെയില്‍വേ സ്റ്റേഷന്‍, പുതുക്കി പണിത അന്താരാഷട്ര വിമാനത്താവളം, രാജ്യത്തെ ആദ്യത്തെ അമൃത് ഭാരത് ട്രെയിനുകള്‍, 6 പുതിയ വന്ദേ ഭാരത് ട്രെയിനുകള്‍, അയോധ്യ ക്ഷേത്രത്തിലേക്കുള്ള നവീകരിച്ച റോഡുകള്‍, അയോധ്യ ഗ്രീന്‍ഫീല്‍ഡ് ടൗണ്‍ഷിപ്പിന് തറക്കല്ലിടല്‍ തുടങ്ങിയ എല്ലാ ചടങ്ങുകളും രാമക്ഷേത്രം കേന്ദ്രീകരിച്ചാണ്.
രാവിലെ 11.15 ന് 240 കോടി ചിലവഴിച്ച് പുതുക്കിയ അയോധ്യാ ധാം റെയില്‍വേ സ്റ്റേഷന്റെ ഉദ്ഘാടനം നടക്കും. ക്ഷേത്ര നിര്‍മ്മിതിയോട് സാമ്യമുള്ളതാണ് അടുത്തിടെ പേര് പുതുക്കിയ സ്റ്റേഷന്റെ നിര്‍മ്മാണം. 12.15ന് 1450 കോടി ചിലവിട്ട് വികസിപ്പിച്ച വിമാനത്താവളം ഉദ്ഘാടനം ചെയ്യും. ഒരുമണിക്ക് റോഡ് ഷോയിലും പൊതു പരിപാടിയിലും മോദി പങ്കെടുക്കും. വമ്പന്‍ പ്രഖ്യാപനങ്ങളുമുണ്ടാകും.
പ്രധാനമന്ത്രിയുടെ സന്ദര്‍ശനത്തോട് അനുബന്ധിച്ച് അയോധ്യ ന?ഗരം മുഴുവന്‍ ഇതിനോടകം അലങ്കരിച്ചു കഴിഞ്ഞു. അയോധ്യ ക്ഷേത്രം പ്രതിഷ്ഠയ്ക്ക് മുമ്പ് രാഷ്ട്രീയ ചര്‍ച്ച സജീവമാക്കാനാകും മോദി ഇന്ന് ശ്രമിക്കുക. വര്‍ഷങ്ങളുടെ തയാറെടുപ്പുകള്‍ക്കു ശേഷമാണ് നരേന്ദ്രമോദി അയോധ്യയിലേക്കെത്തുന്നത്. ലോക്‌സഭാ തെരഞ്ഞെടുപ്പ് പ്രചാരണത്തിന് കൂടിയാണ് ഇവിടെ തുടക്കമിടുന്നത്. നിരോധിത ഖലിസ്ഥാന്‍ സംഘടനാ നേതാവ് ഗുര്‍പത്വന്ത് സിംഗ് പന്നു മോദിയെ റോഡ്‌ഷോക്കിടെ ആക്രമിക്കണമെന്ന് നേരത്തെ ആഹ്വാനം ചെയ്തിരുന്നു.ഈ ഭീഷണി കണക്കിലെടുത്ത് അയോധ്യയില്‍ വിവിധ സേനാ വിഭാഗങ്ങളെയടക്കം വിന്യസിച്ച് സുരക്ഷ ശക്തമാക്കിയിട്ടുണ്ട്.
Facebook
Twitter
