എട്ട് വര്‍ഷത്തെ ബന്ധം അവസാനിപ്പിച്ചതിലുള്ള പക ; കാമുകന്റെ മുഖത്തും സ്വകാര്യഭാഗത്തും ആസിഡ് ഒഴിച്ച് 40 കാരി
പ്രണയ ബന്ധത്തില്‍ നിന്ന് പിന്മാറിയതിന് കാമുകന് മേല്‍ ആസിഡൊഴിച്ചു. രണ്ടു കുട്ടികളുടെ അമ്മയായ 40 കാരിയാണ് പ്രതി. ഗുരുതരമായി പൊള്ളലേറ്റ 52 കാരനെ ആശുപത്രിയില്‍ പ്രവേശിപ്പിച്ചു. അഹമ്മദാബാദിലാണ് സംഭവം നടന്നത്. അഹമ്മദാബാദ് മുനിസിപ്പല്‍ ട്രാന്‍സ്‌പോര്‍ട്ട് സര്‍വീസില്‍ ജോലി ചെയ്യുന്ന 51 കാരനായ ബസ് കണ്ടക്ടര്‍ രാകേഷ് ബ്രഹ്മഭട്ടിനാണ് ഗുരുതരമായി പൊള്ളലേറ്റത്. ജുഹാപുര സ്വദേശിയും രണ്ട് കുട്ടികളുടെ അമ്മയുമായ 40 കാരി മെഹ്‌സാബിന്‍ ചുവാരയാണ് കേസിലെ പ്രതി.
എട്ട് വര്‍ഷത്തെ ബന്ധം അവസാനിപ്പിച്ചതിലുള്ള പകയാണ് ആക്രമണത്തിന് പ്രേരിപ്പിച്ചതെന്ന് കലുപൂര്‍ പൊലീസ് പറയുന്നു. ബസില്‍ വച്ചാണ് ഇരുവരും കാണുന്നതും സൗഹൃദത്തിലാകുന്നതും. ബന്ധം പിന്നീട് പ്രണയമായി മാറി. എട്ടുവര്‍ഷത്തോളം ബന്ധം മുന്നോട്ടുപോയി. അതിനിടെ ബ്രഹ്മഭട്ടിന്റെ ഭാര്യ സംഭവമറിഞ്ഞു. തുടര്‍ന്ന് ബ്രഹ്മഭട്ടിന് ബന്ധത്തില്‍ നിന്ന് പിന്മാറേണ്ടി വന്നു. കാമുകന് പിന്മാറിയതോടെ മെഹ്‌സാബിന്‍ ആക്രമണം ആസൂത്രണം ചെയ്തു. അഹമ്മദാബാദ് റെയില്‍വേ സ്റ്റേഷന് സമീപത്തെ കണ്‍ട്രോള്‍ ക്യാബിനില്‍ വെച്ച് മെഹ്‌സാബിന്‍ ആസിഡ് എറിഞ്ഞു. ബ്രഹ്മഭട്ടിന്റെ മുഖത്തും പുറംഭാഗത്തും സ്വകാര്യഭാഗങ്ങളിലും പൊള്ളലേറ്റു.
വഴിയാത്രക്കാരനാണ് ഇയാളെ അംദുപുരയിലെ ജിസിഎസ് ആശുപത്രിയില്‍ എത്തിച്ചത്. മിത് ശര്‍മ്മ എന്നയാളും യുവതിക്കൊപ്പമുണ്ടായിരുന്നതായി പരാതിക്കാരന്‍ പൊലീസിനോട് പറഞ്ഞു. എന്നാല്‍, കുറ്റകൃത്യം നടന്ന സമയത്ത് ശര്‍മ്മയുടെ സാന്നിധ്യം സ്ഥാപിക്കുന്ന തെളിവുകളൊന്നും ലഭിച്ചിട്ടില്ലെന്ന് പൊലീസ് ഉദ്യോഗസ്ഥര്‍ വ്യക്തമാക്കി. മെഹ്‌സാബിനിന്റെ ഫേസ്ബുക്ക് സുഹൃത്തുക്കളില്‍ ഒരാളാണ് ശര്‍മ. എന്നാല്‍ സംഭവ സമയം ഇയാളുടെ ടവര്‍ ലൊക്കേഷന്‍ മറ്റൊന്നായിരുന്നുവെന്നും പൊലീസ് പറഞ്ഞു.
Facebook
Twitter
