സുബൈര് വധം: സഞ്ജിത്തിന്റെ കാര് എവിടെയെന്ന് അറിയില്ല,വര്ക്ക് ഷോപ്പിലായിരുന്നെന്ന് പിതാവ്
പാലക്കാട് എലപ്പുള്ളി പാറയില് പോപ്പുലര് ഫ്രണ്ട് പ്രവര്ത്തകന് സുബൈറിനെ കൊലപ്പെടുത്തിയ സംഘം ഉപയോഗിച്ചത് മുമ്പ് കൊല്ലപ്പെട്ട ആര്എസ്എസ് പ്രവര്ത്തകന് സഞ്ജിത്തിന്റെ കാര് തന്നെ എന്ന് സ്ഥിരീകരണം. സഞ്ജിത്തിന്റെ പിതാവ് ആറുമുഖന് ഇക്കാര്യം പറഞ്ഞു. സഞ്ജിത്ത് മരിക്കുന്നതിന് മുമ്പ് തന്നെ കാര് വര്ക്ക്ഷോപ്പിലായിരുന്നു. ആരാണ് കാര് ഉപയോഗിക്കുന്നതെന്ന് അറിയില്ലെന്നും ആറുമുഖന് പറഞ്ഞു.
സഞ്ജിത്ത് മരിക്കും മുമ്പ് കാര് കേടായിരുന്നു. അത് നന്നാക്കാന് വര്ക്ക്ഷോപ്പില് നല്കിയിരിക്കുകയായിരുന്നു. പിന്നീട് തിരികെ വാങ്ങിയിരുന്നില്ല. ഏത് വര്ക്ക്ഷോപ്പിലെന്നറിയില്ല. താന് തിരുപ്പൂരിലാണുള്ളത്. സഞ്ജിത്തിന്റെ സഹോദരനും തിരുപ്പൂരിലാണ് ഉള്ളത്. തിരുപ്പൂരില് കട നടത്തുകയാണ് തങ്ങള്. സഞ്ജിത്തിന്റെ കാര് സുബൈറിന്റെ കൊലയാളി സംഘം ഉപയോഗിച്ചു എന്ന് വാര്ത്തകളിലാണറിഞ്ഞത്. സഞ്ജിത്തിന് വലിയ സുഹൃദ് വലയം ഉണ്ട്. അവരാരെങ്കിലുമാണോ ഇതിന് പിന്നിലെന്ന് അറിയില്ല. കാര് സംബന്ധിച്ച് കൂടുതല് അറിയില്ലായിരുന്നു, ഏത് വര്ക്ക്ഷോപ്പിലാണെന്നും അറിയില്ലായിരുന്നു. അതിനാലാണ് സഞ്ജിത്തിന്റെ മരണശേഷം കാര് തിരികെയെടുക്കാഞ്ഞതെന്നും ആറുമുഖന് പറഞ്ഞു.
ഇക്കാര്യം സഞ്ജിത്തിന്റെ ഭാര്യ അര്ഷികയും സ്ഥിരീകരിച്ചു. സഞ്ജിത്ത് മരിക്കുന്നതിന് ഒന്നരമാസം മുമ്പ് വര്ക്ക്ഷോപ്പില് നല്കിയിരുന്നു. ഏത് വര്ക്ക്ഷോപ്പ് എന്നറിയില്ല. മുപ്പതിനായിരത്തിനടുത്ത് ചെലവ് വരുമെന്ന് പറഞ്ഞു. തന്റെ കൈയ്യിലും പണമില്ലായിരുന്നു. സഞ്ജിത്തിന്റെ മരണശേഷം കാറിനെക്കുറിച്ച് അന്വേഷിച്ചില്ല എന്നും അര്ഷിക പറഞ്ഞു. സഞ്ജിത്തിന്റെ ഭാര്യയെ അന്വേഷണ സംഘം ചോദ്യം ചെയ്തു. ഇന്നലെ രാത്രിയാണ് മമ്പറത്തെ വീട്ടിലെത്തി ചോദ്യം ചെയ്തത്.