ലണ്ടന്‍: ഒ ഐ സി സി (യു കെ) - യുടെ പുതിയ നാഷണല്‍ കമ്മിറ്റി സെപ്റ്റംബര്‍ 1 - ന് ചുമതയേല്‍ക്കും. ലണ്ടനിലെ ക്രോയ്ഡനില്‍ വച്ചു സംഘടിപ്പിക്കുന്ന സമ്മേളനം എ ഐ സി സി സെക്രട്ടറി പെരുമാള്‍ വിശ്വനാഥന്‍ ഉദ്ഘാടനം ചെയ്യും.
ക്രോയ്ഡന്‍ സെന്റ്. ജൂഡ് വിത്ത് സെന്റ്. എയ്ഡന്‍ ഹാളില്‍ ഞായറാഴ്ച വൈകിട്ട് 6 മണി മുതലാണ് സമ്മേളനം. ചടങ്ങില്‍ വെച്ചു ഒ ഐ സി സി (യു കെ)യുടെ പുതിയതായി തെരഞ്ഞെടുക്കപ്പെട്ട ഭാരവാഹികള്‍ സത്യപ്രതിജ്ഞ ചെയ്തു ചുമതലയേല്‍ക്കും. യു കെയിലെ വിവിധ റീജിയണല്‍ കമ്മിറ്റികളില്‍ നിന്നും പ്രദേശങ്ങളില്‍ നിന്നുമായി നിരവധി പ്രവര്‍ത്തകര്‍ നാഷണല്‍ കമ്മിറ്റിക്ക് അനുമോദനങ്ങളും അഭിവാദ്യങ്ങളും അര്‍പ്പിക്കുവാന്‍ ചടങ്ങില്‍ അണിചേരും. പരിപാടിയുടെ സുഗമമായ നടത്തിപ്പിനും ഏകോപനത്തിനുമായി ഒ ഐ സി സി (യു കെ) സറെ റീജിയന്‍ പ്രസിഡന്റ് വില്‍സന്‍ ജോര്‍ജിനെ പ്രോഗ്രാം കണ്‍വീനറായി തെരഞ്ഞെടുത്തിട്ടുണ്ട്.
പ്രവാസി മലയാളികള്‍ക്കിടയിലെ കരുത്തുറ്റ സംഘടനകളില്‍ ഒന്നായ ഒഐസിസിയുടെ യു കെയിലെ പ്രവര്‍ത്തനങ്ങള്‍ രാജ്യത്തുടനീളം വ്യാപിപ്പിക്കുക, സംഘടനയില്‍ വനിതകള്‍ / യുവാക്കള്‍ എന്നിവര്‍ക്ക് മതിയായ പ്രാധാന്യം നല്‍കി നേതൃനിരയിലേക്ക് ഉയര്‍ത്തുക എന്നീ ലക്ഷ്യങ്ങള്‍ മുന്‍നിര്‍ത്തിയാണ് കെ പി സി സി ഷൈനു ക്ലെയര്‍ മാത്യൂസിനെ അധ്യക്ഷ സ്ഥാനം നല്‍കിക്കൊണ്ട് ഒ ഐ സി സി (യു കെ) നാഷണല്‍ കമ്മിറ്റി പുനസംഘടിപ്പിച്ചത്. പ്രസിഡന്റ്, 5 വര്‍ക്കിങ് പ്രസിഡന്റുമാര്‍, 5 വൈസ് പ്രസിഡന്റുമാര്‍, 4 ജനറല്‍ സെക്രട്ടറിമാര്‍, 15 ജോയിന്റ് സെക്രട്ടറിമാര്‍, ട്രഷറര്‍, ഔദ്യോഗിക വക്താവ്, 4 അംഗ ഉപദേശക കമ്മിറ്റി, 10 അംഗ എക്‌സിക്യൂട്ടീവ് കമ്മിറ്റി, 4 യുവജന പ്രതിനിധികള്‍ എന്നിവര്‍ ഉള്‍പ്പടെ 49 ഭാരവാഹികളെയാണ് ഓഗസ്റ്റ് 16 - ന് കെ പി സി സി പ്രഖ്യാപിച്ചത്.
സംഘടനയുടെ വാര്‍ത്താകുറിപ്പുകള്‍ പുറത്തിറക്കുന്നതിനും പ്രവര്‍ത്തനങ്ങള്‍ / സമ്മേളനങ്ങള്‍ സംബന്ധമായ വാര്‍ത്തകള്‍, സംഘടനയുമായി ബന്ധപ്പെട്ട അറിയിപ്പുകള്‍ തുടങ്ങിയവ
ഔദ്യോഗികമായി അറിയിക്കുന്നതിനുമായി രണ്ട് അംഗ മീഡിയ സെല്ലും രൂപീകരിച്ചിട്ടുണ്ട്.
യു കെയിലുടനീളം ഒ ഐ സി സിയുടെ സംഘടന സംവിധാനം ശക്തമാക്കുന്നതിന്റെ ഭാഗമായി പുതിയ റീജിയന്‍ കമ്മിറ്റികളുടെ രൂപീകരണം, സമൂഹത്തിലെ നാനാ മേഖലകളില്‍ നിന്നുള്ളവരെ പ്രസ്ഥാനത്തിലേക്ക് ആകര്‍ഷിക്കുന്നതിന് ഉതകുന്ന കര്‍മ്മ പദ്ധതികളുടെ ആസൂത്രണം, സ്ത്രീകള്‍ / യുവജങ്ങള്‍ / ആരോഗ്യ പ്രവര്‍ത്തകര്‍ തുടങ്ങിയവര്‍ക്ക് മുന്‍ഗണന നല്കുന്ന പ്രവര്‍ത്തനങ്ങള്‍ തുടങ്ങിയ വിഷയങ്ങള്‍ക്ക് സംഘടന പ്രഥമ പരിഗണന നല്‍കുമെന്നും കൂട്ടായ പ്രവര്‍ത്തനങ്ങള്‍ക്ക് എല്ലാ ഭാരവാഹികളുടേയും ഒറ്റക്കെട്ടായ പിന്തുണ അഭ്യര്‍ത്ഥിക്കുന്നതായും പ്രസിഡന്റ് ഷൈനു ക്ലെയര്‍ മാത്യൂസ് പറഞ്ഞു.
നേരത്തെ ഒ ഐ സി സി (യു കെ) - യുടെ ചുമതല വഹിക്കുന്ന കെ പി സി സി ഭാരവാഹികളായ ശ്രീ. വി പി സജീന്ദ്രന്‍, ശ്രീ. എം എം നസീര്‍ എന്നിവര്‍ യു കെ സന്ദര്‍ശിച്ചു നാഷണല്‍ കമ്മിറ്റി യോഗത്തില്‍ പങ്കെടുത്തുകൊണ്ടു ഒ ഐ സി സി നേതാക്കന്മാരും പ്രവര്‍ത്തകരുമായും കൂടിക്കാഴ്ച നടത്തുകയും വിശദമായ റിപ്പോര്‍ട്ട് കെ പി സി സിക്ക് സമര്‍പ്പിക്കുകയും ചെയ്തതിന്റെ അടിസ്ഥാനത്തിലാണ് ഒ ഐ സി സി (യു കെ) നാഷണല്‍ കമ്മിറ്റി പുനസംഘടിപ്പിക്കപ്പെട്ടത്.
സമ്മേളന വേദിയുടെ വിലാസം:
St. Jude with St. Aiden Hall
Thornton Heath
CR7 6BA
Facebook
Twitter
