വിമതസൈന്യം രാജ്യത്തിന്റെ അധികാരം പിടിച്ചെടുത്തതോടെ നാടുവിട്ട മുന്‍ സിറിയന്‍ പ്രസിഡന്റ് ബാഷര്‍ അല്‍ അസദ്, ഇസ്രയേലിന് നിര്‍ണായക വിവരങ്ങള്‍ ചോര്‍ത്തിനല്‍കിയെന്ന് ആരോപണം. രാജ്യത്തെ ആയുധശേഖരങ്ങളുടെയും അവ സൂക്ഷിച്ചിരിക്കുന്ന സ്ഥലങ്ങളുടെയും അടക്കമുള്ള വിവരങ്ങള്‍ ചോര്‍ത്തിനല്‍കിയാണ് അസദ് രാജ്യം വിട്ടതെന്നാണ് വിവരം.
രാജ്യം വിട്ട അസദ് ഇപ്പോള്‍ റഷ്യയില്‍ ഉണ്ടെന്നാണ് വിവരം. താന്‍ രാജ്യം വിടുമ്പോള്‍ ഇസ്രയേല്‍ തന്നെ ആക്രമിക്കരുതെന്ന് ഉറപ്പ് ലഭിക്കാനായാണ് ആയുധങ്ങള്‍ ഉളള സ്ഥലങ്ങള്‍ അസദ് ചോര്‍ത്തിക്കൊടുത്തത് എന്നാണ് ഹുറിയത്ത് എന്ന ടര്‍ക്കിഷ് പത്രം റിപ്പോര്‍ട്ട് ചെയ്യുന്നത്. അസദ് രാജ്യം വിട്ടതിന് പിന്നാലെ ഇസ്രയേല്‍ സിറിയയുടെ നാവിക, ആയുധ ശേഖരങ്ങളെല്ലാം തകര്‍ത്തിരുന്നു. അസദ് നല്‍കിയ വിവരങ്ങള്‍ മൂലമാണ് ഈ ആക്രമണമെന്നാണ് ഹുറിയത്ത് റിപ്പോര്‍ട്ട് ചെയ്യുന്നത്.
സിറിയന്‍ ഭരണകൂടത്തിന്റെ ആയുധങ്ങള്‍ വിമതരുടെ കൈവശം എത്തിച്ചേരാതിരിക്കാനാണ് ആക്രമണം എന്നായിരുന്നു ഇസ്രയേലിന്റെ അവകാശവാദം. ബാഷര്‍ ഭരണം നിലംപതിച്ചതിന് പിന്നാലെ 48 മണിക്കൂറിനിടെ 400ലേറെ ആക്രമണങ്ങളാണ് ഇസ്രയേല്‍ സിറിയയില്‍ നടത്തിയത്.
Facebook
Twitter
