അമേരിക്കയില്‍ ഇന്ത്യന്‍ ദന്ത ഡോക്ടര്‍ വെടിയേറ്റ് മരിച്ചു ; കൊല്ലപ്പെട്ടത് ഗ്യാസ് സ്റ്റേഷനില്‍ പാര്‍ട്ട് ടൈം ജോലി ചെയ്യുന്നതിനിടെ
അമേരിക്കയിലെ ദല്ലാസില്‍ ഇന്ത്യന്‍ ദന്ത ഡോക്ടറെ വെടിവച്ച് കൊലപ്പെടുത്തി. ഹൈദരാബാദ് സ്വദേശിയായ 27കാരന്‍ ചന്ദ്രശേഖറാണ് കൊല്ലപ്പെട്ടത്. വെള്ളിയാഴ്ച രാത്രി ദല്ലാസിലെ ഗ്യാസ് സ്റ്റേഷനില്‍ പാര്‍ട്ട് ടൈം ജോലി ചെയ്യുന്നതിനിടെ ഇവിടെയെത്തിയ അജ്ഞാതന്‍ ഇദ്ദേഹത്തെ വെടിവച്ച് കൊലപ്പെടുത്തിയെന്നാണ് വിവരം. ഹൈദരാബാദില്‍ നിന്ന് ഡെന്റല്‍ സര്‍ജറിയില്‍ ബിരുദം കരസ്ഥമാക്കിയ ശേഷമാണ് ചന്ദ്രശേഖര്‍ 2023 ല്‍ ഉന്നത വിദ്യാഭ്യാസം ലക്ഷ്യമിട്ട് യുഎസിലേക്ക് കുടിയേറിയത്.
ആറ് മാസം മുന്‍പ് യുഎസില്‍ ഡെന്റല്‍ സര്‍ജറിയില്‍ മാസ്റ്റേര്‍സ് ബിരുദം പൂര്‍ത്തിയാക്കിയ ഇദ്ദേഹം, ഇതേ മേഖലയില്‍ തൊഴിലിനായി ശ്രമിക്കുകയായിരുന്നു. ഇതിനിടെ ഉപജീവനത്തിനായാണ് ഗ്യാസ് സ്റ്റേഷനില്‍ പാര്‍ട് ടൈം ജോലി ചെയ്തിരുന്നത്. യുവാവിന്റെ കുടുംബവുമായി സമ്പര്‍ക്കത്തിലാണെന്ന് ഹൂസ്റ്റണിലെ ഇന്ത്യന്‍ കോണ്‍സുലേറ്റ് ജനറല്‍ ഓഫീസ് അറിയിച്ചിട്ടുണ്ട്. കൊലപാതകവുമായി ബന്ധപ്പെട്ട കേസില്‍ അന്വേഷണം പുരോഗമിക്കുകയാണെന്നും ഇവര്‍ വ്യക്തമാക്കി.
മൃതദേഹം നാട്ടില്‍ തിരിച്ചെത്തിക്കാന്‍ സാധ്യമായതെല്ലാം ചെയ്യുമെന്ന് തെലങ്കാന മുഖ്യമന്ത്രി രേവന്ത് റെഡ്ഡി അറിയിച്ചു.
Facebook
Twitter
