വിമാനയാത്രക്കാര്‍ക്കായി നോര്‍ത്ത് അമേരിക്കന്‍ എയര്‍ലൈന്‍സായ എയര്‍കാനഡ പുതിയ ആനുകൂല്യങ്ങള്‍ പ്രഖ്യാപിച്ചു. ഇനി മുതല്‍ എക്കണോമി ക്ലാസ് യാത്രക്കാര്‍ക്കും സൗജന്യമായി ബിയറും വൈനും വിതരണം ചെയ്യുമെന്ന് കമ്പനി അറിയിച്ചു.
യാത്രക്കാരുടെ സന്തോഷത്തില്‍ ഭക്ഷണത്തിനും പാനീയത്തിനും വലിയ പങ്കുണ്ടെന്ന് എയര്‍ കാനഡയുടെ വൈസ് പ്രസിഡന്റ് സ്‌കോട്ട് ഓ ലിയറി വ്യക്തമാക്കി.
ബാഗേജ് ഫീസുകള്‍ ഒഴിവാക്കുന്നതിനേക്കാള്‍ കുറഞ്ഞ ചെലവില്‍ പാനീയങ്ങള്‍ സൗജന്യമായി നല്‍കാന്‍ കഴിയുമെന്നും അദ്ദേഹം കൂട്ടിച്ചേര്‍ത്തു. കൂടുതല്‍ യാത്രക്കാരെ ആകര്‍ഷിക്കുകയാണ് ഈ പുതിയ പദ്ധതിയിലൂടെ കമ്പനി ലക്ഷ്യമിടുന്നത്.
മെക്‌സിക്കോ, കരീബിയന്‍ രാജ്യങ്ങള്‍ ഉള്‍പ്പെടെ എയര്‍ കാനഡയുടെ എല്ലാ യാത്രാ മാര്‍ഗങ്ങളിലും ഈ സൗജന്യ സേവനം ലഭ്യമാകും. ബിയര്‍, വൈന്‍ എന്നിവ കൂടാതെ കാനഡയില്‍ നിര്‍മ്മിച്ച പ്രത്യേക സ്‌നാക്കുകളും കോംപ്ലിമെന്ററി ആയി നല്‍കും. മറ്റ് പ്രധാന യുഎസ് എയര്‍ലൈന്‍സുകളായ അമേരിക്കന്‍, ഡെല്‍റ്റ, യുണൈറ്റഡ് തുടങ്ങിയവയില്‍ ഇത്തരം സൗജന്യ പാനീയങ്ങള്‍ ലഭ്യമല്ല. സ്പിരിറ്റ് ,ഫ്രൊണ്‍ടിയര്‍, ജെറ്റ്ബ്ലൂ ബജറ്റ് എയര്‍ലൈന്‍സുകള്‍ പാനീയങ്ങള്‍ക്ക് പണം ഈടാക്കുന്നു.
Facebook
Twitter
