മുങ്ങുന്ന കപ്പലില് ലൈഫ് ബോട്ടും പ്രതീക്ഷിച്ചു കഴിയുന്ന കപ്പല് ജീവനക്കാരനെ പോലെയാണ് വീക്ഷണം, മാണി ഗ്രൂപ്പിനെ യുഡിഎഫിലേക്ക് ക്ഷണിച്ചുള്ള ലേഖനത്തിന് മറുപടിയുമായി പ്രതിച്ഛായ
മാണി ഗ്രൂപ്പിനെ യുഡിഎഫിലേക്ക് ക്ഷണിച്ചുള്ള വീക്ഷണം ലേഖനത്തിന് മറുപടിയുമായി മാണി ഗ്രൂപ്പ് മുഖപത്രം പ്രതിച്ഛായ. കേരള കോണ്ഗ്രസ് എമ്മിന്റെ പൊളിറ്റിക്കല് ക്രെഡിബിലിറ്റി തകര്ക്കാനുള്ള ശ്രമമാണ് നടന്നത്. വീക്ഷണം പത്രത്തിനും അതിന് പിന്നിലുള്ള കോണ്ഗ്രസ് നേതാക്കള്ക്കും ചരിത്രബോധം ഉണ്ടാവണം. മാണി സാറിനോട് കോണ്ഗ്രസ് കാട്ടിയ നെറികേട് അദ്ദേഹം ആത്മകഥയില് എഴുതിയിട്ടുണ്ട്. യുഡിഎഫ് മാണി ഗ്രൂപ്പിനെ ചതിച്ചു പുറത്താക്കുകയായിരുന്നു. കേരള കോണ്ഗ്രസ് എം അജയ്യ രാഷ്ട്രീയ ശക്തി ആയതിന്റെ വേവലാതിയാണ് മുഖപ്രസംഗത്തിന് പിന്നിലെന്നും പ്രതിച്ഛായ വിശദമാക്കുന്നു. മുങ്ങുന്ന കപ്പലില് ലൈഫ് ബോട്ടും പ്രതീക്ഷിച്ചു കഴിയുന്ന കപ്പല് ജീവനക്കാരനെ പോലെയാണ് വീക്ഷണം എന്നുമാണ് പ്രതിച്ഛായയുടെ പരിഹാസം.
കേരള കോണ്ഗ്രസ് എല്ഡിഎഫ് വിട്ട് യുഡിഎഫിലേക്ക് മടങ്ങണം എന്നാണ് കഴിഞ്ഞ ദിവസം കോണ്ഗ്രസ് മുഖപത്രം ആവശ്യപ്പെട്ടത്. ജോസ് കെ മാണി സിപിഎം അരക്കില്ലത്തില് വെന്തുരുകരുത് എന്നും ദേശീയ പാര്ട്ടി പദവിയും ചിഹ്നവും നിലനിര്ത്താനുള്ള പോരാട്ടത്തില് ഇരു കമ്യൂണിസ്റ്റ് പാര്ട്ടികള്ക്കും ജോസ് കെ മാണിയുടെ മോഹങ്ങള് നിറവേറ്റിക്കൊടുക്കാന് സാധ്യമല്ലെന്നും വീക്ഷണം വിശദമാക്കിയിരുന്നു.