കുവൈത്തില് ഇനി വാഹന ഉടമസ്ഥാവകാശം കൈമാറുക വളരെ എളുപ്പം. കുവൈറ്റ് സര്ക്കാരിന്റെ ഔദ്യോഗിക ആപ്പായ സഹല് ആപ്പില് ഇതിനുള്ള പുതിയ സേവനം ആരംഭിച്ചതോടെയാണിത്. ഡിജിറ്റല് സേവനങ്ങളുടെ സൗകര്യവും കാര്യക്ഷമതയും വര്ധിപ്പിക്കുന്നതിനുള്ള നീക്കത്തിന്റെ ഭാഗമായാണിത്.
വാഹന ഉടമസ്ഥാവകാശം കൈമാറുന്നതിനായി പ്രത്യേകം രൂപകല്പ്പന ചെയ്ത പുതിയ ഇലക്ട്രോണിക് സേവനം സഹല് ആപ്പ് വഴി അവതരിപ്പിച്ചിരിക്കുകയാണ് കുവൈറ്റിലെ ആഭ്യന്തര മന്ത്രാലയം. വാഹന കൈമാറ്റത്തിനായി ഇനി പേപ്പര്വര്ക്കുകളോ സര്ക്കാര് ഓഫീസുകളില് കയറി ഇറങ്ങുകയോ ചെയ്യേണ്ട ആവശ്യമില്ല. പൂര്ണമായി ഡിജിറ്റല് സംവിധാനത്തിലൂടെ ഈ സേവനം ലഭ്യമാകും.
ഇതിനായി ആദ്യം വില്പ്പനക്കാരനാണ് സഹല് ആപ്പ് വഴി നടപടിക്രമങ്ങള് ആരംഭിക്കേണ്ടത്. സ്വന്തം സ്മാര്ട്ട്ഫോണില് നിന്ന് സഹല് ആപ്പ് ലോഗിന് ചെയ്ത ശേഷം 'സേവനങ്ങള്' എന്ന മെനുവിലേക്ക് പോയി അവിടെ നിന്ന് 'ആഭ്യന്തര മന്ത്രാലയം' തിരഞ്ഞെടുക്കുക. തുടര്ന്ന് അതിലെ 'ട്രാഫിക് സേവനങ്ങള്' സെലക്ട് ചെയ്ത് 'ട്രാന്സ്ഫര് വെഹിക്കിള് ഓണര്ഷിപ്പ്' എന്നത് തിരഞ്ഞെടുക്കുക. ആപ്പ് ആവശ്യപ്പെടുന്ന പുതിയ ഉടമയുടെ സിവില് ഐഡി നമ്പര്, വാഹന വിശദാംശങ്ങള് തുടങ്ങിയ വിവരങ്ങള് പൂരിപ്പിക്കുക. എല്ലാ വിവരങ്ങളും ശരിയായി നല്കിയ ശേഷം സബ്മിറ്റ് ബട്ടന് അമര്ത്തുന്നതോടെ വാഹനത്തിന്റെ പുതിയ ഉടമയ്ക്ക് സഹല് ആപ്പിലേക്ക് വാഹന കൈമാറ്റവുമായി ബന്ധപ്പെട്ട നോട്ടിഫിക്കേഷന് ലഭിക്കും.
തുടര്ന്നുള്ള നടപടിക്രമങ്ങള് പൂര്ത്തിയാക്കേണ്ടത് വാഹനം വാങ്ങുന്ന വ്യക്തിയാണ്. ഇദ്ദേഹത്തിന് സഹല് ആപ്പില് ലഭിച്ച നോട്ടിഫിക്കേഷനില് ക്ലിക്ക് ചെയ്ത ശേഷം വാഹനവുമായി ബന്ധപ്പെട്ട് നേരത്തേ വാഹനത്തിന്റെ ആദ്യ ഉടമ നല്കിയ വിശദാംശങ്ങള് ശ്രദ്ധാപൂര്വ്വം അവലോകനം ചെയ്ത ശേഷം അവ ശരിയാണെന്ന് ഉറപ്പുവരുത്തി കൈമാറ്റം അംഗീകരിക്കണം. ഇതിന് ആക്സപ്റ്റ് ബട്ടന് തെരഞ്ഞെടുക്കണം. ശേഷം ബാധകമായ ട്രാന്സ്ഫര് ഫീസ് അടച്ച് ആവശ്യമായ ഇന്ഷുറന്സ് രേഖ ആപ്പ് വഴി അപ്ലോഡ് ചെയ്യണം. പേയ്മെന്റ് പൂര്ത്തിയാക്കിയ ശേഷം, വാങ്ങുന്നയാള് വാഹന കൈമാറ്റത്തിന് ഫൈനല് അപ്രൂവല് നല്കണം.
ഇടപാടിന് വാങ്ങുന്നയാള് അന്തിമ അംഗീകാരം നല്കിയാലുടന് സഹല് ആപ്പില് വില്പ്പനക്കാരന് ഇതുമായി ബന്ധപ്പെട്ട സ്ഥിരീകരണ അറിയിപ്പ് ലഭിക്കും. ഇതോടെ വാഹനത്തിന്റെ ഉടമസ്ഥാവകാശ കൈമാറ്റം പൂര്ത്തിയാവും. ഇതിനു ശേഷം പുതിയ ഉടമയ്ക്ക് ഇപ്പോള് സഹല് ആപ്പ് വഴി പുതിയ ഇലക്ട്രോണിക് വാഹന ലൈസന്സ് ഡൗണ്ലോഡ് ചെയ്യാം. ഈ ലൈസന്സ് ആപ്പിലെ ഡിജിറ്റല് വാലറ്റില് സ്റ്റോര് ചെയ്യപ്പെടുകയും ചെയ്യും.