ലണ്ടന്‍:കാദോഷ് മരിയന്‍ മിനിസ്ട്രീസിന്റെ നേതൃത്വത്തില്‍ യു കെ യില്‍ ഇദംപ്രഥമമായി സംഘടിപ്പിക്കുന്ന കൃപാസനം മരിയന്‍ ഉടമ്പടി ധ്യാനവേദി വാത്സിങ്ങാമില്‍ നിന്നും ബെര്‍മിംഗ്ഹാം ബഥേല്‍ കണ്‍വെന്‍ഷന്‍ സെന്ററിലേക്ക് മാറ്റി. ധ്യാനത്തില്‍ പങ്കുചേരാനായി റജിസ്‌ട്രേഷന്‍ നടപടി തുടങ്ങിയപ്പോള്‍ മുതല്‍ കാണുന്ന വലിയ താല്‍പ്പര്യവും തിരക്കും സൗകര്യവും പരിഗണിച്ചാണ് വാത്സിങ്ങാമില്‍ നിന്നും വേദി മാറ്റിയതെന്ന് സംഘാടകര്‍ അറിയിച്ചു. പുതിയ തീരുമാനപ്രകാരം ബെര്‍മിംഗ്ഹാം ബഥേല്‍ കണ്‍വെന്‍ഷന്‍ സെന്ററില്‍ വെച്ച് 2025 ഓഗസ്റ്റ്മാസം 2 നും 3 നും ആണ് ദ്വിദിന ധ്യാനം നടക്കുക. എയ്ല്‍സ്ഫോര്‍ഡില്‍ വെച്ച് നടത്തുവാന്‍ തീരുമാനിച്ച കൃപാസനം ഉടമ്പടി ധ്യാനം ഓഗസ്റ്റ് മാസം 6 നും 7 നും എയ്ല്‍സ്ഫോര്‍ഡ് മരിയന്‍ തീര്‍ത്ഥാടന കേന്ദ്രത്തില്‍ വെച്ചുതന്നെ നടത്തപ്പെടുന്നതാണ്.
കൃപാസനം മരിയന്‍ ധ്യാനങ്ങള്‍ക്ക് കണ്ണൂര്‍ ലത്തീന്‍ രൂപതയുടെ അഭിവന്ദ്യ അദ്ധ്യക്ഷന്‍ ബിഷപ് മാര്‍ ഡോ. അലക്‌സ് വടക്കുംതലയും, കൃപാസനം മരിയന്റിട്രീറ്റ് സെന്ററിന്റെ സ്ഥാപകനും ഡയറക്ടറുമായറവ. ഡോ. ജോസഫ് വലിയവീട്ടിലും നേതൃത്വം നല്‍കും. യു.കെ റോമന്‍ കത്തോലിക്കാ പള്ളിയുടെ ചാപ്ലിനും, തിരുവചന പ്രഘോഷകനുമായ ഫാ. വിങ്സ്റ്റണ്‍ വാവച്ചന്‍, ബ്ര.തോമസ് ജോര്‍ജ്ജ് (ചെയര്‍മാന്‍,കാദോഷ് മരിയന്‍ മിനിസ്ട്രീസ്) തുടങ്ങിയവര്‍ ശുശ്രൂഷകള്‍ നയിക്കും.
ആത്മീയ നവീകരണത്തിനും, പരിശുദ്ധ അമ്മക്ക് സമര്‍പ്പിതമായ വിശ്വാസ അനുഭവത്തിനുമായി ഒരുക്കുന്ന നാലു ദിവസത്തെ താമസിച്ചുള്ള ധ്യാനങ്ങള്‍ യു കെ യിലെ ബെര്‍മിംഗ്ഹാമിലും, എയ്ല്‍സ്ഫോര്‍ഡിലും രണ്ടു ദിവസം വീതമാണ് ക്രമീകരിച്ചിരിക്കുന്നത്. ധ്യാനത്തില്‍ പങ്കുചേരുന്നവര്‍ താമസ സൗകര്യം സ്വയം കണ്ടെത്തേണ്ടതാണ്.
പരിശുദ്ധ കന്യാമറിയത്തിന്റെ അഭിലാഷപ്രകാരം ആരംഭിച്ച കൃപാസനംമരിയന്‍ റിട്രീറ്റ് സെന്ററില്‍ പരിശുദ്ധ അമ്മയുമായി പ്രാര്‍ത്ഥനയില്‍ എടുക്കുന്ന ഉടമ്പടിയിലൂടെ ജീവിതം ക്രമീകരിക്കുമ്പോള്‍ ലഭിക്കുന്ന അത്ഭുതാനുഭവങ്ങള്‍ക്കും, രോഗശാന്തികള്‍ക്കും, അനുഗ്രഹങ്ങള്‍ക്കും നിത്യേന ലഭിക്കുന്ന അനുഭവ സാക്ഷ്യങ്ങള്‍ നിരവധിയാണ്.
വിശ്വാസജീവിതം ഉടമ്പടി പ്രകാരം നയിക്കുമ്പോള്‍ മാതൃ മാദ്ധ്യസ്ഥത്തില്‍, ദിവ്യസുതന്‍ നല്‍കുന്ന അനുഗ്രഹങ്ങളെ റെസിഡന്‍ഷ്യല്‍ കൃപാസനം ഉടമ്പടി ധ്യാനങ്ങളിലൂടെ അനുഭവവേദ്യമാക്കുവാനും, അനന്തമായ ദൈവീക കൃപകള്‍ പ്രാപിക്കുന്നതിനും ഉള്ള അവസരമാണ് കാദോഷ് മരിയന്‍ മിനിസ്ട്രി യു കെ യില്‍ ഒരുക്കന്നത്.
രാവിലെ എട്ടരക്ക് ജപമാല സമര്‍പ്പണത്തോടെ ആരംഭിക്കുന്ന പ്രതിദിന ശുശ്രൂഷകളില്‍ തുടര്‍ന്ന് ആരാധന, സ്തുതിപ്പ്, വിശുദ്ധ കുര്‍ബാന, തിരുവചന ശുശ്രൂഷ, അനുരഞ്ജന ശുശ്രൂഷ എന്നിവ ഉണ്ടായിരിക്കും. ദിവ്യകാരുണ്യ ആരാധനയോടെ പ്രതിദിന ധ്യാന ശുശ്രുഷ വൈകുന്നേരം നാലരയോടെ സമാപിക്കും.
യു കെ യിലെ സമ്മര്‍ദ്ദവും തിരക്കും നിറഞ്ഞ പ്രവാസ ജീവിത
സാഹചര്യങ്ങള്‍ക്കിടയില്‍ കൈവന്നിരിക്കുന്ന കൃപാസനം മരിയന്‍ ഉടമ്പടി ധ്യാന അവസരം പ്രയോജനപ്പെടുത്തുവാനും, അനുഗ്രഹങ്ങളുടെ വാതായനങ്ങള്‍ തുറന്നു കിട്ടുന്ന തിരുവചന ശുശ്രൂഷയിലും തിരുക്കര്‍മ്മങ്ങളിലും പങ്കുചേരുവാനും കാദോഷ് മരിയന്‍ മിനിസ്ട്രീസ് ഏവരെയും സ്‌നേഹപൂര്‍വ്വം യേശു നാമത്തില്‍ ക്ഷണിക്കുന്നു.
കൃപാസനം ഉടമ്പടി ധ്യാനത്തില്‍ പങ്കുചേരുവാന്‍ ആഗ്രഹിക്കുന്നവര്‍ നിര്‍ബന്ധമായും തങ്ങളുടെ പേരുകള്‍ മുന്‍കൂട്ടി രെജിസ്റ്റര്‍ ചെയ്യേണ്ടതാണെന്നു സംഘാടകര്‍ അറിയിച്ചു.
Click Here Birmingham registration link
Click Here Aylesford registration link
For More Details:
07770730769, 07459873176
Facebook
Twitter
