ന്യൂയോര്‍ക്ക്: നായര്‍ ബനവലന്റ് അസോസിയേഷന്റെ ഈ വര്‍ഷത്തെ ഓണാഘോഷം വര്‍ണ്ണാഭമായി. സെപ്തംബര്‍ 7 ഞായറാഴ്ച ക്വീന്‍സിലെ ഗ്ലെന്‍ ഓക്‌സിലുള്ള P.S.115 ഓഡിറ്റോറിയത്തില്‍ വെച്ച് രാവിലെ 11 മണി മുതല്‍ വൈകീട്ട് 6:00 മണി വരെയായിരുന്നു വളരെ വിപുലമായ രീതിയില്‍ രണ്ട് സെഷനുകളായിട്ടാണ് ആഘോഷം സംഘടിപ്പിച്ചത്.
താലപ്പൊലിയുടെയും ചെണ്ടമേളത്തിന്റെയും അകമ്പടിയോടെ മാവേലിത്തമ്പുരാനെ വേദിയിലേക്ക് എതിരേറ്റ് ആനയിച്ചു. പ്രഥമ വനിത വത്സ കൃഷ്ണ, പ്രസിഡന്റ് ക്രിസ് പിള്ള തോപ്പില്‍, കൗണ്‍സില്‍മാന്‍ എഡ് ബ്രോണ്‍സ്‌റ്റൈന്‍, ട്രസ്റ്റീ ബോര്‍ഡ് ചെയര്‍പേഴ്‌സണ്‍ വനജ നായര്‍, വനിത ഫോറം ചെയര്‍ രാധാമണി നായര്‍ എന്നിവര്‍ ചേര്‍ന്ന് ഭദ്രദീപം കൊളുത്തി ആദ്യത്തെ സെഷന്‍ ആരംഭിച്ചു. ശബരീനാഥ് നായര്‍ പ്രാര്‍ത്ഥനാഗാനം ആലപിച്ചു.
ജോയിന്റ് സെക്രട്ടറി രത്‌നമ്മ നായര്‍ സ്വാഗതം ആശംസിക്കുകയും ഓണാശംസകള്‍ നേരുകയും ചെയ്തു. പ്രസിഡന്റ് ക്രിസ് പിള്ള തോപ്പില്‍ ഏവര്‍ക്കും ഓണത്തിന്റെ മംഗളങ്ങള്‍ നേരുകയും അസോസിയേഷനില്‍ ചേര്‍ന്ന പുതിയ അംഗങ്ങളെ പരിചയപ്പെടുത്തുകയും ചെയ്തു.
ഓണാഘോഷത്തില്‍ പങ്കെടുക്കാനെത്തിയ സഹോദര സംഘടനകളായ മഹിമ, എസ്.എന്‍.എ., മറ്റു മലയാളി അസോസിയേഷനുകളുടെ ഭാരവാഹികള്‍ക്ക് പ്രസിഡന്റ് പ്രത്യേകം നന്ദി പറഞ്ഞു.
വിശിഷ്ടാതിഥിയായി ഓണ്‍ലൈനിലൂടെ ഓണസന്ദേശം നല്‍കിയ ഡോ. ലതാ ചന്ദ്രന്‍ എന്‍.ബി.എ.യുടെ മുന്‍ പ്രസിഡന്റുമാണ്. താനും കുടുംബവും ഫ്‌ലോറിഡയിലേക്ക് താമസം മാറിയെങ്കിലും ഇന്നും മനസ്സുകൊണ്ട് എന്‍.ബി.എ. കുടുംബാംഗങ്ങളോടൊപ്പമാണെന്ന് ഓണസന്ദേശം നല്‍കിക്കൊണ്ട് ഡോ ലത പറഞ്ഞു. ചിത്രജാ ചന്ദ്രമോഹന്‍ വിശിഷ്ടാതിഥിയെ സദസ്സിനു പരിചയപ്പെടുത്തി.
മുഖ്യാതിഥിയായ കൗണ്‍സില്‍മാന്‍ എഡ് ബ്രോണ്‍സ്‌റ്റൈനെ കോശി ഒ തോമസ് പരിചയപ്പെടുത്തി. കൗണ്‍സില്‍മാന്‍ എഡ് ബ്രോണ്‍സ്‌റ്റൈന്‍, ഓണാഘോഷത്തില്‍ പങ്കെടുക്കുവാന്‍ സാധിച്ചതിലുള്ള സന്തോഷം രേഖപ്പെടുത്തുകയും എല്ലാവര്‍ക്കും ഓണത്തിന്റെ മംഗളങ്ങള്‍ നേരുകയും ചെയ്തു.
തുടര്‍ന്ന് ട്രസ്റ്റീ ബോര്‍ഡ് ചെയര്‍പേഴ്‌സണ്‍ വനജ നായര്‍ വാമന ജയന്തിയും ഓണവുമായിട്ടെങ്ങനെ ബന്ധപ്പെട്ടിരിക്കുന്നു എന്ന് വിശദീകരിച്ചു. മഹാവിഷ്ണുവിന്റെ അവതാരമായ വാമനന്റെ ജന്മനക്ഷത്രം ആണ് ഓണം. ബഹുമാനത്തോടെ പറയുന്ന നക്ഷത്രങ്ങളുടെ കൂടെ തിരു അല്ലെങ്കില്‍ തൃ ചേര്‍ത്തു പറയുന്നതാണ് തിരുവോണം എന്നും പറഞ്ഞു. യുവതലമുറയെ പ്രതിനിധാനം ചെയ്ത് രേവതി രാമാനുജന്‍ ഓണസന്ദേശം നല്‍കി.
അപ്പുക്കുട്ടന്‍ പിള്ള മഹാബലിയായി വേഷമിട്ടു. 51-ാം വര്‍ഷവും വിവിധ വേദികളില്‍ തുടര്‍ച്ചയായി മഹാബലി വേഷം കെട്ടുന്ന, ഗിന്നസ് ബുക്കില്‍ പേരുവരാന്‍ പോകുന്ന അപ്പുക്കുട്ടന്‍ പിള്ള ഓണ സന്ദേശം നല്‍കുകയും പ്രജകളെ അനുഗ്രഹിക്കുകയും ചെയ്തു. അസോസിയേഷനിലെ പെണ്‍കുട്ടികള്‍ ഊര്‍മ്മിള റാണി നായരുടെ നേതൃത്വത്തില്‍ അവതരിപ്പിച്ച തിരുവാതിര കാണികളുടെ മനം കവര്‍ന്നു.
അംഗങ്ങള്‍ സ്വവസതിയില്‍ വച്ച് പാചകം ചെയ്തു കൊണ്ടുവന്ന് തൂശനിലയിട്ടു വിളമ്പിയ വിഭവസമൃദ്ധമായ ഓണസദ്യ വളരെ ഹൃദ്യമായി. സദ്യ ഒരുക്കുന്നതിന് നേതൃത്വം നല്‍കിയ സുശീലാമ്മ പിള്ളയുടെ സേവനം അഭിനന്ദനീയമാണ്.
സദ്യക്കുശേഷം രണ്ടാം സെഷന്‍ ആരംഭിച്ചു. കലാപരിപാടികള്‍ നിയന്ത്രിച്ചത് ഊര്‍മ്മിള റാണി നായര്‍ ആയിരുന്നു. രേവതി രാമാനുജനും വത്സ കൃഷ്ണയും ചേര്‍ന്ന് എം.സി.യുടെ കര്‍ത്തവ്യം മനോഹരമാക്കി.
നൂപുര ആര്‍ട്‌സിലെ ലക്ഷ്മി നായരുടെ ശിക്ഷണത്തില്‍ പഠിച്ചു വന്ന കുട്ടികളുടെ അര മണിക്കൂര്‍ നീണ്ടുനിന്ന സംഘ-നൃത്ത-നാടകം, ലതിക ഉണ്ണിയുടെ ശിക്ഷണത്തില്‍ വന്ന കുട്ടികളുടെ നൃത്തനൃത്യങ്ങളും ഒന്നിനൊന്നു മികച്ചുനിന്നു.
നൂപുരാ ഡാന്‍സ് സ്‌കൂളിലെ ഗുരു രവീന്ദ്രനാഥ് കുറുപ്പ് (പ്രശസ്ത കവി പരേതനായ ഒ.എന്‍.വി. കുറുപ്പിന്റെ സഹോദര പുത്രനാണ്), നൃത്താധ്യാപികമാരായ ചന്ദ്രികാ കുറുപ്പ്, ലക്ഷ്മി കുറപ്പ് എന്നിവരെ വേദിയില്‍ വച്ച് ആദരിക്കുകയും സദസ്സിലുള്ള എല്ലാവരും സ്റ്റാന്‍ഡിംഗ് ഒവേഷന്‍ നല്‍കുകയും ഉണ്ടായി.
ശബരീനാഥ് നായര്‍, രവി നായര്‍, പ്രേം കൃഷ്ണ, ഹിമാ നായര്‍ എന്നിവര്‍ മനോഹരങ്ങളായ ഗാനങ്ങള്‍ ആലപിച്ചപ്പോള്‍ കുന്നപ്പള്ളില്‍ രാജഗോപാല്‍, രാധാമണി നായര്‍ എന്നിവര്‍ കവിതകള്‍ ആലപിച്ചു. രേവതി രാമാനുജനും ഭര്‍ത്താവ് മനു രാഘവനും ചേര്‍ന്ന് ആലപിച്ച ശാസ്ത്രീയസംഗീതം ഏവരെയും ഹഠാദാകര്‍ഷിച്ചു.
ഓണാഘോഷത്തിനു മാറ്റു കൂട്ടാന്‍ ക്ഷണിക്കപ്പെട്ട അതിഥിയായെത്തിയ കഥാകൃത്തും കേരള സാഹിത്യ അക്കാഡമി അവാര്‍ഡ് ജേതാവും മിമിക്രി കലാകാരനുമായ സുനീഷ് വാരനാട് തനിക്കു കിട്ടിയ സമയം തന്റെ സ്വതസിദ്ധമായ ശൈലിയില്‍ നാടന്‍ പാട്ടു പാടിയും അനുകരണകലയിലൂടെയും സദസ്സിന്റെ മനം കവര്‍ന്നു.
വൈസ് പ്രസിഡന്റ് ഡോ. ചന്ദ്രമോഹന്‍ ഏവര്‍ക്കും കൃതജ്ഞത രേഖപ്പെടുത്തി.
തുടര്‍ന്നു നടന്ന റാഫിള്‍ നറുക്കെടുപ്പില്‍ ഡോ. ചന്ദ്രമോഹന്‍ സ്‌പോണ്‍സര്‍ ചെയ്ത ഒന്നാം സമ്മാനമായ 58'' ടി.വി., ഗായകനായും ഫോട്ടോഗ്രാഫറായും തിളങ്ങിയ പ്രേം കൃഷ്ണനും, രണ്ടാം സമ്മാനമായ, കുന്നപ്പള്ളില്‍ രാജഗോപാല്‍ സ്‌പോണ്‍സര്‍ ചെയ്ത സാംസങ് 11'' നോട്ടുബുക്ക് ഉണ്ണിക്കൃഷ്ണ മേനോനും, മൂന്നാം സമ്മാനമായ, സെക്രട്ടറി രഘുവരന്‍ നായര്‍ സ്‌പോണ്‍സര്‍ ചെയ്ത സിറ്റിസണ്‍സ് വാച്ച് ന്യൂജേഴ്‌സിയില്‍ നിന്നുള്ള പ്രവീണ്‍ നായര്‍ക്കും ലഭിച്ചു.
പതിവുപോലെ വേദി കലാപരമായി അണിയിച്ചൊരുക്കിയത് സുധാകരന്‍ പിള്ളയും മനോഹരമായ പൂക്കളമിട്ടത് രാകേഷ് നായരും കുടുംബാംഗങ്ങളും ചേര്‍ന്നാണ്.
ദേശീയ ഗാനാലാപനത്തോടെ ഓണാഘോഷത്തിന് തിരശ്ശീല വീണു.
വാര്‍ത്ത: ജയപ്രകാശ് നായര്‍
.jpeg)
.jpeg)
.jpeg)
Facebook
Twitter
