സ്വകാര്യത കാത്തു സൂക്ഷിക്കുന്ന ആപ്ലിക്കേഷനുകള്‍ ഉപയോഗിക്കണം ; വാട്‌സാപ്പ് ഉപയോക്താക്കള്‍ക്ക് സൗദി ധനകാര്യ മന്ത്രാലയം മുന്നറിയിപ്പ്
രാജ്യത്തെ വാട്‌സാപ്പ് ഉപയോക്താക്കള്‍ക്ക് സൗദി ധനകാര്യ മന്ത്രാലയം മുന്നറിയിപ്പ് നല്‍കി. മന്ത്രാലയവുമായി നേരിട്ട് ബന്ധമുള്ളതോ, അല്ലാത്തതോ ആയ കാര്യങ്ങള്‍ വാട്‌സ് ആപ്പ് വഴി പങ്കുവെക്കരുത്. വാട്‌സാപ്പില്‍ ഈയിടെ സ്വകാര്യത നയത്തില്‍ ഉണ്ടായ മാറ്റത്തിന്റെ അടിസ്ഥാനത്തിലാണ് മുന്നറിയിപ്പ്. സ്വകാര്യത കാത്തു സൂക്ഷിക്കുന്ന ആപ്ലിക്കേഷനുകള്‍ ഉപയോഗിക്കണമെന്നും മന്ത്രാലയം ആവശ്യപ്പെട്ടു.
ഉപയോക്താക്കളുടെ സ്വകാര്യത നയത്തില്‍ ഈയിടെയാണ് വാട്‌സ് ആപ്പ് മാറ്റം വരുത്തിയത്. ഈ സാഹചര്യത്തിലാണ് വാട്‌സ് ആപ്പ് വഴി വിവരങ്ങള്‍ പങ്കുവെക്കുന്നതിനെതിരെ സൌദി ധനകാര്യ മന്ത്രാലയത്തിന്റെ മുന്നറിയിപ്പ്. മന്ത്രാലയവുമായി നേരിട്ട് ബന്ധമുള്ളതോ, അല്ലാത്തതോ ആയ യാതൊരു വിവരങ്ങളും വാട്‌സാപ്പ് വഴി പങ്കുവെക്കരുതെന്ന് ധനകാര്യ മന്ത്രാലയം ഉപയോഗക്താക്കളോടാവശ്യപ്പെട്ടു. വ്യക്തിഗത ഉപയോഗത്തിനായി കൂടുതല്‍ സ്വകാര്യത കാത്ത് സൂക്ഷിക്കുന്ന നിരവധി ആപ്ലിക്കേഷനുകള്‍ വേറെയുണ്ടെന്നും മന്ത്രാലയം കൂട്ടിച്ചേര്‍ത്തു.
വാട്‌സാപ്പിന്റെ മാതൃ കമ്പനിയായ ഫേസ്ബുക്കുമായി വിവരങ്ങള്‍ പങ്കുവെക്കുമെന്നും അതിന് അനുമതി നല്‍കാത്ത ഉപയോക്താക്കള്‍ക്ക് തുടര്‍ന്ന് വാട്‌സ് ആപ്പ് സേവനം ലഭ്യമാകില്ലെന്നും അടുത്തിടെയാണ് വാട്‌സാപ്പ് ഉപയോക്താക്കളെ അറിയിച്ചത്. ഇതനുസരിച്ച് വാട്‌സാപ്പ് ഉപയോഗിക്കുന്ന മൊബൈലിന്റെ ഐ.പി അഡ്രസ്സ്, സ്ഥാനം എന്നിവ വ്യക്തമാക്കും. കൂടാതെ ഫോണ് നമ്പര്‍, അക്കൌണ്ട് ഇമേജുകള്‍, വാട്‌സാപ്പ് വഴി ചെയ്യുന്ന ഓരോ പ്രവര്‍ത്തനങ്ങള്‍ തുടങ്ങിയ കാര്യങ്ങള്‍ ഫേസ് ബുക്കിന് കൈമാറാന്‍ വാട്‌സാപ്പിന് സാധിക്കുന്നതാണ് പുതിയ മാറ്റം. ഇതേ തുടര്‍ന്ന് വാട്‌സാപ്പില്‍ നിന്ന് മാറി സിഗ്‌നല്‍ പോലുള്ള മറ്റ് ആപ്ലിക്കേഷനിലേക്ക് മാറുകയാണ് പല ഉപയോക്താക്കളും.
Facebook
Twitter
