തിളച്ച ചൂടുള്ള കാപ്പി തലയിലൂടെ ഒഴിച്ച ശേഷം ക്രൂരമായ മര്‍ദ്ദനത്തിന് ഇരയായ സര്‍വ്വീസ് സ്റ്റേഷന്‍ കസ്റ്റമര്‍ മരണത്തിന് കീഴടങ്ങി. മെല്‍ബണിലാണ് ഞെട്ടിക്കുന്ന അക്രമസംഭവം അരങ്ങേറിയത്.
ചൊവ്വാഴ്ചയാണ് 52-കാരിയായ സ്ത്രീക്ക് നേരെ ജീവഹാനി നേരിടുന്ന തരത്തില്‍ അക്രമം നടന്നത്. രാവിലെ 10.15ഓടെ 7 ഇലവന്‍ സര്‍വ്വീസ് സ്‌റ്റേഷനിലെത്തിയ സ്ത്രീയാണ് അക്രമിക്കപ്പെട്ടത്.
ഇരയുടെ തലയിലൂടെ മറ്റൊരു സ്ത്രീയാണ് ചൂട് കാപ്പി ഒഴിച്ചതെന്ന് ദൃക്‌സാക്ഷികള്‍ പറഞ്ഞു. ഇതിന് ശേഷം മര്‍ദ്ദിക്കുക കൂടി ചെയ്ത ശേഷമാണ് ഈ സ്ത്രീകള്‍ സ്ഥലത്ത് നിന്നും രക്ഷപ്പെട്ടത്.
സംഭവസ്ഥലത്തെത്തിയ പോലീസ് ഉദ്യോഗസ്ഥര്‍ ഞെട്ടലിലായ മറ്റ് സാക്ഷികളില്‍ നിന്നും വിവരങ്ങള്‍ ചോദിച്ചറിഞ്ഞു. രണ്ട് ജീവനക്കാരാണ് സ്ഥലത്ത് ഉണ്ടായിരുന്നത്. സര്‍വ്വീസ് സ്‌റ്റേഷനിലെ സിസിടിവിയില്‍ നിന്നുള്ള ദൃശ്യങ്ങള്‍ പോലീസിന് കൈമാറും.
50-കളില്‍ പ്രായമുള്ള രണ്ട് സ്ത്രീകള്‍ക്കെതിരെയാണ് പോലീസ് കേസെടുത്തിരിക്കുന്നത്. അറസ്റ്റിലായ ഇവരെ കോടതിയില്‍ ഹാജരാക്കി. സ്ത്രീയുടെ മരണത്തിന് കാരണമായ വിവരം ലഭിക്കാന്‍ പോസ്റ്റ്‌മോര്‍ട്ടം റിപ്പോര്‍ട്ടിനായി കാത്തിരിക്കുകയാണ് പോലീസ്.
Facebook
Twitter
